The Definitive Guide to Living in the Capital , Cairo , Egypt

عمل أسود، رواية للكاتب تامر عطوة بتتكلم عن السحر، وبتتكلم عن الدين، وعن (هشام) البطل اللي تقريبًا في الأربعين من عمره، وزوجته بتحبه جدًا، ومخلصة له طول الوقت، وهو شخص معروف ورياضي ووسيم، يعني باختصار هو رجل مناسب جدًا، وعلشان كده مراته بتحبه جدًا ومش عايزة تزعله أبدًا، لكن الفكرة بقى أن هو اللي عايز يسيبها، لأنه ببساطة شايف أنه لازم يتجوز واحدة تانية، غيرها، ولازم يبقى عايش حياته.

في الأول السبب مش بيبقى باين قوي هو ليه عايز يعمل كده، لكن الأكيد أننا بنبدأ الرواية زي أفكار الكتابة الجديدة، من موقف مثير للزوجة اللي عرفت أن زوجها بيخونها وقررت تروح وتراقبه علشان تعرف (هى التانية أحسن مني في إيه) ولما تروح وتكتشف المكان (تغلط في الشقة) وتضرب واحدة تانية على اعتبار أنها عشيقة جوزها، وعلى فين بقى لما تكتشف الموضوع.

أكيد مش هنحرق لكم باقي الأحداث، المهم محور الرواية هشام واللي بيحبوه وأصحابه اللي كل واحد فيهم موضوع لوحده، يعني فيهم رجل الدين المشهور (بس هو مشهور بس مش متدين) وفيه مدرب التنمية البشرية (الملحد) واللي بيتكلم حلو قوي على فكرة، وفيهم الرجل البسيط، وفيهم الست اللي أصلها فرنسي.. الشخصيات كتير، واللغة اللي بيكتب بيها تامر عطوة لغة جيدة، لأنه ببساطة بيعرف يوصف ويحكي، بيخليك ماشي معاه زي ما هو عايز لكن نقدر نقول بلغة شبابية قوي، بتهتم بالبساطة علشان يوصل أسرع.

لما نتابع الشخصيات الدينية عند تامر هنلاقيها شخصيات مش قد كده، يعني مش علشان تبقى مختلف لازم تطلع كل رجال الدين في الرواية بيعملوا أعمال، ومش لازم الشيخ المشهور على اليوتيوب يبقى بيدي الدروس للي يدفع له فلوس أكتر، أكيد فيه ناس متدينة تدين حقيقي وأخلاقها أرقى من كدة.. مش كده ولا إيه؟؟

عمومًا اقروا الرواية وقولوا لنا رأيكم.