The Definitive Guide to Living in the Capital , Cairo , Egypt

كلنا متابعين أزمة نقل معرض الكتاب للتجمع الخامس. ورغم الحلول اللي وفرتها الدولة ومنظمي المعرض، زي توفير أتوبيسات مجانية وخطوط مواصلات من كل حته للمعرض. إلا إن التوقعات بتقول إن الناس مش هتروح السنة دي. ده غير دعوات كتير بتطالب بوجود بدائل. علشان كده إحنا في كايرو 360 بنرشح لك 4 بدائل، تقدر تشتري منهم كتب بأسعار مخفضة.

1- دار الكتاب

الدار تابعة لهيئة الكتب، الجهة المنظمة لمعرض الكتاب. ولها مقر دائم تقدر تشتري منه الكتب اللي من إصداراتهم. ومقرهم في 1194 كورنيش النيل، منطقة بولاق أبو العلا.

وكمان لهم فروع تانية في: 30 شارع 26 يوليو، قدام دار القضاء العالي – مكتبة في 19 شارع 26 يوليو – مكتبة شريف في 26 شارع شريف –  مكتبة في 5 ميدان عرابي، التوفيقية – مكتبة الحسين، مدخل 2 الباب الأخضر، حي الحسين – مكتبة ساقية الصاوي بالزمالك – مكتبة السيدة زينب في 13 شارع المبتديان –  مكتبة 15 مايو خلف جهاز المدينة – مكتبة الجيزة في 1 شارع مراد، ميدان الجيزة – مكتبة جامعة القاهرة بجوار كلية إعلام. ومواعيدهم من الأحد للخميس، من الساعة 9 صباحًا حتى 3 عصرًا.

2- دار المعارف

أما دار المعارف فتقدر تشتري من عندهم الكتب بدءًا من 5 جنيه. ومقراتهم شاملة كتب كتيرة جدًا لجميع الفئات. وموجودين في: ١١١٩ كورنيش النيل، ماسبيرو. دي شغلها من الأحد للخميس من 9 حتى 4 عصرًا –  27 شارع عبد الخالق ثروت، تقاطع شارع شريف، عابدين. ودول شغالين طوال أيام الاسبوع من الساعة 8 صباحًا حتى 9 مساءًا.

3- نادي الربع

في نادي الربع الكتب بتبدأ من 1 جنيه. هتلاقوا مستعمل وجديد، وكتب مميزة في كل المجالات. مع مجموعات أدبية وثقافية وشعر.. الخ. يعني مش هتخرج من عندهم، غير وانت محمل كل اللي نفسك فيه. وهم دايمًا عندهم خصومات وبيبيعوا بسعر كويس. إحنا شخصيًا اشترينا مجموعة “مثنوي” منهم بـ 100 جنيه. وكمان أعمال مجموعة نجيب محفوظ بسعر 250 جنيه. مقر النادي في 3 حارة السنانيري، متفرع من شارع المعز، داخل مركز الربع الثقافي، خلف مسجد الأقمر. وبيبقوا فاتحين من 12 الضهر حتى 11 بالليل.

4- سور الأزبكية

تجار سور الأزبكية أعلى مترو العتبة بجوار المسرح القومي، أعلنوا رسميًا عن “مهرجان سور الأزبكية للكتاب النصف سنوي”. في الفترة من 15 يناير حتى 9 فبراير. بخصومات تصل إلى 80%. مؤكدين أنهم لا يعادون معرض الكتاب، ولكن شروطه لا تناسبهم.