من قلب أم إلى كل أم: دليلك لأجمل كتب الأمومة والتربية في مكتبات القاهرة
أم فريدة أم في مهمة أنا وطفلي والطبيب اعرف طفلك وعلّم عليه دار الرواق دار الشروق دار نهضة مصر كتب تربية الأطفال كتب للأمهات هدايا للأمهات
Mohamed Talaat
الصورة الرئيسية: Bonnie Kittle
في السنوات الأخيرة أصبح فيه زيادة في عدد الكتب المكتوبة من الأمهات وللأمهات، وهنا بنقترح عليكم إيه رأيكم تهادوا ماما بكتاب مميز يسليها في النهار، وفي نفس الوقت يفيدها ويخليها تتعرف أكثر على مجتمع الأمهات اللي هي بالفعل واحدة منهن.
أم فريدة
كتاب أم فريدة من تأليف بسمة السباعي، هو عبارة عن مقالات متنوعة بتتكلم عن مواقف كتير بيعشيها المتجوزين مع ولادهم وحكايات شخصية مرّت بيها الكاتبة كأم.
الكتاب بيطرح سؤال مهم، هل هنستريح لما نكبّر ولادنا ونجوزّهم ولا هنفضل شايلين أعباءهم على طول؟
الكتاب صادر عن دار نهضة مصر.
أنا وطفلي والطبيب
أنا وطفلي والطبيب من تأليف دكتور الأطفال الشهير إبراهيم شكري، والكتاب عبارة عن خلاصة سنين من الخبرة العملية، كتبه المؤلف مخصوص للأم علشان يكون مرجع ليها في أمور كتير خاصة بحياة طفلها والعناية بيه، وتنشئته وتربيته تربية السليمة، وكمان الكتاب بيعرّف الأم معلومات كتير عن الأمراض اللي ممكن يصاب بيها ابنها.
من عيوب الكتاب أنه مش بيتحدّث بالشكل الكافي اللي يضمن أنه المعلومات هتكون جديدة وعلى الرغم من كدة فالكتاب مفيد جدًا وهو من إصدارات دار الشروق وطبعًا متوفر في كل مكتباتها.
اعرف طفلك وعلّم عليه
للكاتبة نهى الجندي ويعتبر من الكتب القوية للأمهات، نظرًا لأنه كاتبته من الكاتبات المتخصصات في الكتابة عن الأم والطفل في واحد من المواقع الشهيرة، وده اللي بيخلّي الكتاب مليان معلومات مفيدة مبنية على قراءات وبيخلينا نصنفه ككتاب تنمية ذاتية أو Self Help أكتر منه كتاب حكي ذاتي زي كتب تانية في المجال ده على الرغم من أنه مليان حكايات ومواقف كتير للكاتبة مع بنتها.
الكتاب بيتناول موضوعات عن الطفل من أول الولادة وحتى سن الحضانة مرورًا بتفاصيل الأساليب التربوية والأكل والشرب والحاجات المفيدة اللي تشتريها الأم، وكمان الكتاب بيكسر أنماط كتير تقليدية في التربية وبيتكلم بشكل واقعي مناسب لجيل الشباب بعيدًا عن نصائح الجدات الحالمة.
الكتاب من إصدارات دار الشروق ومتاح في جميع مكتباتها.
أم في مهمة
الكتاب ده من الكتب الخفيفة إللي فيها معلومات مقدمة بشكل سلسل من غير تعقيد ولا وجع دماغ، مناسب للأمهات الجداد لأنه بيكلم عن البيبي من أول الولادة لحد ما يتفطم، وهو عبارة عن قصص ومواقف مرت بيها الكاتبة مع ذكر المعلومات والتفاصيل إللي كانت بتعرفها من الدكتور أو من خلال قراءاتها المتنوعة. الكتاب من تأليف سارة البدري، وهو من إصدار دار الرواق للنشر والتوزيع ومتوفر في المكتبات الكبيرة.
