The Definitive Guide to Living in the Capital , Cairo , Egypt

كتب

كتاب “راجل ناقص”.. رحلة البحث عن الاكتمال

2020 ثقافة راجل ناقص رحاب صبري قراءة كتب معرض الكتاب مكتبات القاهرة
كتاب “راجل ناقص”.. رحلة البحث عن الاكتمال
بواسطة
Mohamed Talaat

لعشاق الكتب الاجتماعية، خلال أيام هيصدر كتاب جديد في معرض القاهرة الدولي للكتاب 2020، بعنوان “راجل ناقص”، وهو من تأليف المذيعة رحاب صبري، وهي كاتبة شابة لها إصدارات سابقة، والكتاب بيعتبر الجزء الثاني من أول كتاب لها واللي كان بعنوان “مشروع عانس”.

“راجل ناقص” بيتكلم عن الحاجات اللي ناقصة في حياة الرجالة، وعن عدم وجود امرأة في حياتهم، وبيظهر في الكتاب تأثر الكاتبة بالعلاقات الشخصية، والتجارب اللي بتمر على الإنسان، وبناء الأسرة، وبيحتوي “راجل ناقص” على مجموعة قصص قصيرة.

وبتقول رحاب صبري في حوارها مع كايرو 360 إن الكتاب فيه مجموعة قصصية مختلفة، منها قصة عن الشاب اللي عنده حلم وأخلص له ونسي الحب في حياته، ولما قلبه دق وبقى يحب اكتشف أن فيه فرق سنين كتير بينه وبين حبيبته، بسبب أنه نسي نفسه وأهمل الحب في حياته.

وكمان الكتاب فيه قصة عن شخص تاني اهتم بنفسه وبشكله، لكنه نسي العلاقات في حياته لحد ما أصبح وحيد، ولكن غروره منعه من أنه يقدر يكون أسرة أو يعيش قصة حب مميزة، وانبهر بالحياة المزيفة اللي كان عايشها، وفيه كمان قصص عن الرجل اللي بيكون أسرة وبيت لكنه بيتحارب، والراجل اللي بيخون مراته وأولاده، رغم استقراره، وخسارته ليهم بعد الخيانة وتأثير ده عليه، وغيرها من القصص اللي بتحكي عن عالم الرجالة.

رحاب صبري خريجة كلية سياحة وفنادق، جامعة حلوان، بتشتغل مذيعة وكاتبة، اشتغلت في الصحافة والتليفزيون، وشاركت في تقديم أكتر من مهرجان مصري لعدة قنوات، وكل ده وهي لسه طالبة، وفي السنة النهائية من الكلية نجحت في إنها ترصد مجموعة قصص للبنات حولتهم لمنتج ظهر للنور وكان أول مجموعة قصصية لها بعنوان “مشروع عانس” في 2015، وحقق نجاح كبير.

وبعدها اتنشر لها رواية “قلوب ما وراء الجدران”، وهي رواية بتتكلم عن العنف وخاصة العنف الأسري سواء كان من أو ضد السيدات، وتأثير ده على المجتمع، واستكملت رواياتها بإصدار “كيميرا”، اللي فيها بترصد حالة طبية نادر في العالم.

مقترح