لو نفسك تقرأ كتاب مميز: دي أفضل كتب صدرت في 2017
Mustafa Abd Rabu
سنة جديدة بدأت، وحبينا نقدم القائمة الخاصة بموقع كايرو 360 لأفضل الكتب من وجهة نظرنا. وللأسف السنة دي كان عدد الكتب اللي صدر قليل جدًا بالنسبة للأعوام اللي فاتت، وبالتالي عدد الأعمال الجيدة أقل كثير، سواء العربية أو المترجمة. واخترنا أفضل 5 كتب صدرت خلال العام، ونتمنى إنها تعجبكم.
موت صغير
بعد رواية إليف شفق قواعد العشق الأربعون أصبحت الكتابة عن الصوفية موضة، اجتاحت العالم العربي كله، وظهرت روايات كتير بتتكلم عن الصوفية بسطحية شديدة.
وعلى العكس ظهرت رواية موت صغير للروائي السعودي محمد حسن علوان اللي بتحكي قصة المتصوف الأكبر محي الدين بن عربي. الرواية مقسومة جزأين، الأول هو قصة المخطوطات اللي فيها سيرة حياة ابن عربي. المخطوطات قامت برحلات شاقة جدًا، ماتفرقش كتير عن حياة ابن عربي نفسه. والجزء الثاني هي قصة حياة ابن عربي، اللي بدأت في الأندلس وبعدين راح دمشق واستقر أخيرًا في مكة.
محمد حسن علوان من مواليد الرياض عام 1979 صدر له 4 روايات سقف الكفاية وصوفيا طوق الطهارة ورشحت روايته القندس لجائزة البوكر.
الوشم الأبيض
الطبيب النفسي المصري أشرف المدني، عايش في مونتريال في كندا، بيصادف مريض اسمه جون سباستيان. بيكتشف إنه حالة خاصة جدًا، جون متخصص في رسم الوشوم، وبيحاول يقنع الدكتور أشرف بكلامه وأفكاره الغريبة، جون مقتنع تمامًا إنه يعرف أشرف من زمان في حياة تانية، لأنه مؤمن بمبدأ تناسخ الأرواح.
بطل الرواية بيتعامل معاه كأي مريض فصام، إلى أن تظهر طالبة الطب السمراء من أصول إفريقية مود بيير، وبيشوف أشرف الوشم الأبيض اللي رسمه جون على جلدها، ومن خلاله بيسخرها لخدمته. وبتحصل علاقة حب بين أشرف ومود.
باختصار مُخل عشان منحرقش الأحداث دي حبكة رواية الوشم الأبيض رائعة الروائي المصري أسامة علام.
القاريء هيلاحظ إن كل شيء في الرواية دي مختلف عن اللي اتعود عليه القاريء العربي. وبالذات طريقة السرد اللي اختارها الكاتب. القاريء ممكن يحس إن الرواية مش مترابطة. لكن في الحقيقة إن أسامة علام ماسك أدواته كويس، وعارف هو بيعمل إيه. لأن الرواية بالشكل ده ممكن تبتدي من أي فصل وتنتهي بأي فصل !
عامة أسامة علام من الروائيين القلائل اللي عندهم مشروع حقيقي، وده واضح من روايته الأولى (الاختفاء العجيب لرجل مدهش).
كل هذا الهراء
الرواية دي قدر كاتبها إنه يسوّقها كويس قبل ما تتنشر، وقدم خلطة مضمونة النجاح لجذب القراء، ونجح فعلًا في عمل خلافات قوية بين القراء ما بين رافض للرواية ومتقبل لها.
وبعيدًا عن الأحكام الأخلاقية نقدر نقول إن عز الدين شكري فشير كتب الرواية دي عشان يعبر عن إحباطه من فشل الثورة وإجهاضها. ويقول كل اللي عنده من غير تزويق ويوثق الأحداث المهمة في الكام سنة اللي فاتوا.
كل شخصيات الرواية هي تجسيد لطوائف الشعب. بداية من عمر فخر الدين بطل الرواية المحبط، وأمل المصرية الأمريكية المتفائلة طول الوقت من غير مناسبة. وباقي الشخصيات ماشية بنفس الطريقة.
عز الدين شكري مش قادر يفارق ملعبه المفضل، مش قادر يبعد عن السياسة اللي غالبًا ما تفسد الأدب. ومن الواضح إنه بيكتب الرواية عشان يوصل مفاهيم أو معلومات أو قيم معينة بيعبر عنها بشخصياته والحوارات بينهم. لكن المهم هنا إن أجواء الرواية بعدت عن عالم روايته الأخيرة باب الخروج وانحازت شوية للإنسان.
عز الدين شكري أستاذ العلوم السياسية بالجامعة الأمريكية، وله ستة روايات من أهمها غرفة العناية المركزة وعناق عند جسر بروكلين.
حمام الدار
الروائي الكويتي الشاب سعود السنعوسي يفاجئنا برواية حمام الدار المختلفة عن كل اللي كتبه قبل كده، ورغم إن الرواية صدرت آخر السنة إلا أنها عملت صدى كبير.
الرواية مقسومة جزأين العهد القديم والعهد الجديد. كل قسم بيحكيه راوي مختلف. اختار الكاتب الشكل ده مش لمجرد تجريب حاجة جديدة، لكن عشان يستفز القاريء، ونقدر نقول إن السنعوسي بيصنع القاريء بتاعة بنفسه، عايز قاريء صبور ومهتم بالتفاصيل ومثابر، مش مجرد قاريء لرواية وخلاص لمجرد تضييع الوقت.
سعود السنعوسي روائي كويتي مواليد 1981 حصل على جائزة البوكر العربية عام 2013 عن روايته الرائعة ساق البامبو. وصدر له رواية فئران أمي حصة.
في غرفة العنكبوت
أثارت رواية في غرفة العنكبوت ضجة كبيرة من وقت صدورها، عشان بتحكي عن عالم المثليين جنسيًا، وبطلها الشاب هاني محفوظ بيحكي عن تجاربه. الضجة كانت سبب في نجاح الرواية الكبير وانتشارها، وكمان أسلوب الروائي الشاب محمد عبد النبي الروائي والكاتب المحترف. والفضول وحب الاستطلاع من القراء إنهم يتعرفوا على عالم غريب محدش يعرف عنه أي حاجة، رغم إن المثليين موجودين حوالينا.
خلفية الرواية تستند على واقعة حقيقية حصلت في بداية الألفية، وسميتها الصحافة بحادثة الكوين بوت. داهمت فيها الشرطة سفينة راسية على شط النيل واقتادت كل اللي فيها الى السجن. وكان منهم بطل الرواية هاني محفوظ، ومن حواليه بعض الشخصيات الفرعية اللي أثرت في حياته سواء بالسلب أو بالإيجاب.
بعيدًا عن الحكم الأخلاقي على الرواية، محمد عبد النبي روائي محترف وكاتب متميز. وكان طبيعي إن رواية زي دي بتدور في عوالم المثليين جنسيًا إنها تتهاجم بهذا الشكل. وللقاريء الحق بعد القراءة إنه يرفضها أو يقبلها.
محمد عبد النبي روائي ومترجم مصري من مواليد 1977 رشحت روايته في غرفة العنكبوت لجائزة ساويرس وفي القائمة القصيرة لجائزة البوكر.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
