أفضل 5 أغاني في 2016: الحب مش كل حاجة !
Mustafa Abd Rabu
القائمة دي كان المفروض تبقى أفضل 10 أغاني في 2016 لكن للأسف -وبكل بساطة- مالقيناش. الفكرة إننا كنا عايزين نختار أغاني ممكن ماتكونش مشهورة قوي، لكن مختلفة عن السائد، بعيدًا عن أغاني الحب وجرح الإحساس وقلوب الناس اللي هيشربوا من نفس الكاس، والحاجات دي !
الأمل الأخير
سر تميز أغنية الأمل الأخير اللي غناها “خالد سليم” في ألبومه الأخير أستاذ الهوى هي فكرتها المختلفة عن السائد. الشاعر والملحن عبد العزيز الشافعي ابتعد عن الأغاني العاطفية، وقدم كلمات وألحان بتجسد معاناة الفقير، وبتطالب بحقه في حياة كريمة.
(خلوه يتعلم من حقه يعيش ويكمل وكفاية عليه اتحمل م الدنيا وآسى كتير)
وذكاء وجرأة من خالد سليم أنه يضمن الأغنية في الألبوم وماتبقاش أغنية سينجل مثلًا.
اللُقا
من كام سنة -وبعد خفوت مدحت صالح بسبب إهماله- أصبح محمد حماقي هو المطرب الرسمي للسينما المصرية، وخاصة بعد النجاح الكبير لأغنية ذكرياتك ميح من فيلم زهايمر.
وفي فيلم من 30 سنة غنى حماقي أغنية اللُقا علشان تختصر حدوتة الفيلم كله. كلمات أيمن بهجت قمر المتجددة عبرت بشكل كويس عن فكرة الرضا بالقدر، وإن اللقا والفراق قسمة ونصيب. الفكرة دي اتقالت قبل كده كتير جدًا. لكن أيمن بهجت قمر المشغول طول الوقت أنه يلاقي تعبيرات جديدة لأفكار قديمة، نجح في صياغة الفكرة بشكل كبير. لكن خانه تعبير (كله ماشي مصيره تحته) وماكنش موفق، وغريب على المستمع إلى حد كبير. ومن الواضح إصراره على كلمة تحته علشان تلاقي كلمة راحته في السطر اللي بعدها.
توزيع تميم مش مؤثر تماما. لحن مدين شبه حاجات كتير عملها قبل كده مع حماقي. واحترم المناطق الأكثر جمالا في صوت حماقي، طبقة القرار (الطبقة المنخفضة) والمتوسطة وتعامل معاها كنقاط قوة لازم يبروزها ويستفيد منها.
رحلة الحياة
بغض النظر عن عنوان الأغنية لكن مضمونها متميز وكل عناصرها متكاملة. أيمن بهجت قمر كان في أفضل حالاته خلال الموسم. وبجرأة المعتادة هنسمع تعبيرات، ماكنش المستمع يتخيّل إنها ممكن تتقال في أغنية. تعبيرات قوية جدًا، قربت من مساحات الحكمة اللي بنقرأها عند الشعراء الكبار.
(الكل متحيّر إكمنه متخيّر.. ولا حد آمن للعتمة ولا حد ضامن ضيّ)
لحن القدير وليد سعد لوحده حكاية. الجملة من البداية رقيقة وفيها لمسة شجن ضرورية كتمهيد للحالة. انتقل اللحن بسلاسة غير عادية من مقام الكرد إلى مقام الصبا زمزمة عند (وقت اللُقا قصير) نقلة سريعة اتعملت بذكاء وحرفية تعبيرًا عن ألم الفراق. وكمان إبداع وليد سعد عند (ولا حد آمن للعتمة ولا حتى ضامن ضيّ) هنا الانكسار في الجملة اللحنية علشان تجسد حالة الانهزام واليأس والخوف.
كل ما أغني
شيرين عبد الوهاب من أهم الأصوات على الساحة. والسنة دي فاجئتنا بدويتو جميل بنكهة أمريكا اللاتينية وموسيقى الفلامنكو مع حسام حبيب في أغنية كل ما أغني.
صوت شيرين بيتميز بحاجات كتير، زي الإحساس، والمساحة الواسعة، والخامة المتميزة، لكن الأهم واللي ظاهر هنا، هو قدرتها على إضافة طعم خاص لأي لحن بتغنيه. ومهما كان اللحن عادي، شيرين بتخليه لحن براق وجميل. الجملة اللحنية جميلة في الأساس، وشيرين غنتها أفضل من الملحن.
نصيبي وقسمتك
نقدر نقول إن أغنية مسلسل نصيبي وقسمتك أجمل أغنية في 2016 بلا منازع.
غناها محمد الصاوي وللأسف مش مكتوب مين الملحن، وحتى مافيش إشارة إن اللحن مقتبس من أغنية تانية.
الأغنية ساهمت في نجاح المسلسل، الناس حفظوها لأنها لمست مشاعرهم بصدقها وبساطتها. عامة الكلمات أجمل من الكلام عنها أو شرحها أو تحليلها.
ولأن (الصمت في حرم الجمال جمال) هنسيبكوا تسمعوها أكثر من مرة، وتستمتعوا بالجمال والصدق والرقة من غير رغي أو غروشة.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
