The Definitive Guide to Living in the Capital , Cairo , Egypt

كتب: محمود حافظ

” أنا الجاني….وأنا المجني عليه

أنا كل الأسباب ولسة بسأل ليه “

اتفقت أو اختلفت معاهم، فريق كايروكي أثبتوا أنهم حالة فريدة، بتجديد مستمر كل مرة، وأفكار مبتكرة بتسبب جدل، والأهم أن فنهم دايمًا في صف جمهورهم الأول، الشباب بكل اللي جواه من مشاعر معقدة ونوازع مكبوتة، والنوازع دي مش رومانسية وحب بس زي اللي معظم المطربين الكبار بيقدموه في ألبوماتهم.

الشباب دول بدأوا إزاي وإمتى؟ وليه انتقلوا من ميدان التحرير وسط تأييد جيل الثورة وانتهوا بالمنع من الرقابة السنة دي؟

البداية قبل الهجوم

 

 

كايروكي بدأوا في 2003 وكانوا ناويين يغنوا بالأنجليزي أصلًا تحت اسم (The black Star)، لكنهم غيروا رأيهم وفضّلوا لغة تناسب جيلهم أكتر، بدايتهم الحقيقية كانت مع ثورة يناير، بأغنية (صوت الحرية) اللي اتغنت في الميدان نفسه قبل تنحي الرئيس الأسبق مبارك بيوم، ومن بعدها أصدروا ألبوم كامل اسمه (مطلوب زعيم) في نفس السنة، واستمروا في طرح  التجارب الجديدة زي أغنية (مربوط بأستك) اللي أبهرت الناس كلها بكلماتها وبالفيديو كليب العجيب بتاعها.

رغم أنهم فازوا بجايزة (الميما) لأفضل فريق غنائي في الشرق الأوسط مرتين بعد تحقيقهم أعلى مبيعات لألبوم (السكة شمال) و(وأنا قاعد مع نفسي)، ورغم الشعبية الكبيرة في حفلات الساقية وغيرها، ألبوم كايروكي الأخير (نقطة بيضا) اتمنع رقابيًا من الطرح في الأسواق وفي وسائل الإذاعة والتليفزيون، ومش بس كده، الألبوم اتهاجم من الموسيقار حلمي بكر كمان وقال إن الفريق لازم يتقبض عليه!

نقطتهم البيضا..سودا قدام الرقابة

رغم أن الرقابة اعترضت على 4 أغاني بس من 11، بسبب إن الكلمات فيها إيحاءات سياسية، وده حسب كلام مغني الفرقة الرئيسي أمير عيد في حواره لموقع التحرير، في نفس الوقت أمير بيأكد أنهم استغربوا من الهجوم ده كله، لأنهم ماقالوش غير كلام الشباب المتداول على السوشيال ميديا وعلى القهاوي.

 

 

كايروكي قرروا يطرحوا الألبوم كامل على النت في قناتهم الرسمية وعلى الديجيتال ستورز بس، رغم الخسارة المادية الكبيرة في الحالة دي، علشان رؤيتهم توصل للجمهور كاملة زي ما هي، الشباب بكل ما فيهم من صراع، والحقيقة أن مشاهدات الألبوم تخطت 35 مليون بعد شهر واحد وحقق مبيعات عالية وفي نص شهر 8 كان الألبوم متصدر الآي تيونز وضمن الـ top ten  على أنغامي وسبوتيفاي.

 وفي تقريرنا النهارده هنفاجئكم بالتجديد في ألبوم كايروكي المرة دي، وأول تجديد أن الألبوم كله متصور للفرقة وهي بتغنيه، في الدعاية نفسها كتبوا (ألبوم موسيقي مصور).

1- نقطة بيضا.. كلمات أمير عيد وألحان كايروكي

 

 

9 أغاني من الألبوم بكلمات أمير نفسه، وأولهم نقطة بيضا، من أول لحظات الأغنية بتعرف أنها شيء مختلف.. لأنها بتبدأ بتصفير أمير بداية اللحن، وده مش جديد عليه أنه يضم صوته كموسيقى في الأغنية زي ما عملها في (السكة شمال)، لما تسمع قفلة الأغنية بالطريقة نفسها هتعرف أن الفكرة موفقة.

أما بالنسبة للكلمات، فهي كالعادة عن صراع داخلي رهيب جوه الإنسان، وصوت الجمال والبراءة بينادي بالعافية وسط دوشة الشر والدنيا اللي مابترحمش، الصوت ده هو النقطة البيضا في وسط السواد.. هو الأصل الطيب وسط التقليد السخيف، والحرب بين الأتنين مابتقفش (جوايا عقل وقلب، دايمًا عايشين في حرب، قلبي حاسس بالذنب، وعقلي واخد جنب).

 

 

ومن جديد بينضم المنشد عبد الرحمن رشدي مع الفرقة، بظهور قصير لكنه مؤثر بشكل واضح، لأن غناه الصوفي بطبقة أخف وسط الموسيقى العالية كانت معبرة جدًا عن الصوت الطيب الضعيف أو النقطة البيضا، والأجمل كمان أنه كان لابس أبيض بخلاف كل الفرقة اللي لابسة أسود!، لغة بصرية عالية والناس فهمت الفكرة وحسيتها، والأغنية وصلت 5 مليون مشاهدة لغاية النهارده.

 

2- هدنة… كلمات أمير عيد وألحان كايروكي

أول أغنية اعترضت عليها الرقابة، موسيقى حزينة من الأول توحي لك باغتراب شديد، بتعبر عن حال الشباب بصراحة مفرطة زي ما المؤلف صرح، الهدنة هنا جواه وآن الأوان يحارب، كأنه سمع الصوت الطيب اللي في الأغنية الأولى، فعلًا الأغنية بتهاجم المجتمع كله، بتصفه أنه مجرم بشكل عام.. كله شارك في الجريمة وداس على الزناد، بيقول بصراحة أنه كفر بكل شيء إلا ربه.

حتى اضطهاد الأنثى كان ليه نصيب في الكلام (هي تغلط يدبحوها وتتاوى، هو يغلط يقولوا دي شقاوة)، رغم الكلمات الكتير إلا أن الأغنية ماكملتش 5 دقائق لكنها قربت على 5 مليون مشاهدة.

 

3- كنت فاكر… كلمات أمير عيد وألحان كايروكي

على عكس الأغنية اللي فاتت، المرة دي المساحة أكبر للموسيقى بس، حديثة في إيقاعها وشبابية جدًا، برغم أن الموضوع قديم جدًا وياما اتغنى عنه، (كنت فاكر لسه بدري..وأتاري العمر بيجري)، يمكن تفتكر الأغنية عن السن والفرص الضايعة، لكن الحقيقة إنها عن الأم.

فرقة وسط البلد عملوها قبل كده وغنوا عن الأم في فيلم (عودة الندلة)، لكن كايروكي غنوها بشجن شديد، (أشوفك تاني واقفة بعيد بتشاوري تقولي ده ابني من لحمي ودمي، وتضحكيلي ضحكة وحشاني، وفحضنك أرمي أحزاني)، الأغنية وصلت 3 مليون مشاهدة وفعلًا هتبكيك لو ركزت معاها.

 

4- اضحك… كلمات دعاء عبد الوهاب وألحان كايروكي

الأغنية بتقول اضحك صحيح، لكن الضحك بدماغ وفلسفة! يعني اللحن برضه هادي جدًا مش مبهج صاخب بس هيخليك تفكر، نفس جو أغنية (أجمل ما عندي) لكايروكي برضه، يعني هتفكر ليه أصلًا تضحك في عالم مؤلم زي ده؟ الأغنية هتجاوبك.

(اضحك كأن الفرْح مقسوم علشان ضحكتك، وازعل كأن البكا عمره ما هيموتك)، دي كانت البداية ومنها بنروح لأسباب تانية تخلينا نضحك، زي (لمسة ايدين تعشقك، لمة صحاب حواليك دنيا غريبة إنما فيها حاجات ملهمة زي النجوم في السما، طالعة علشان تهديك)، وأخيرًا هيقولك لو لقيت فرح امسك فيه وزود على قد ما تقدر (إن دقت لحظة هنا زود ساعتها الغنا أحلام كتير ممكنة).

 

5- ليلى… كلمات أمير عيد وألحان كايروكي

نفرح شوية مع أغنية رومانسية، كالعادة ليلى متصدرة كل أغاني الحب من أيام قيس بن الملوح! كلماتها كلها بهجة وألحانها أبهج، زي ما يكون أمير بيوجهها لحبيبته فعلًا وبيعترف أنه نفسه يعمل أغنية باسمها (من زمان نفسي أغنيلك، واحكيلك قد إيه أنا بحبك، وأمسك قلمي وأكتب لك، واعمل أغنية باسمك).

برضه أمير بيستغل اسم (ليلى) وبيضمه لموسيقى الأغنية بحيث تلاقي نفسك بتغنيه معاه، ودي أول أغنية مبهجة في الألبوم.

 

6- الديناصور… كلمات أمير عيد وألحان كايروكي

 

 

تاني أغنية اتمنعت من الرقابة، ويمكن تكون أكتر أغنية عليها اعتراض كمان، لأنها بترصد المجتمع بعيون منتقدة كل حاجة خلال الكام سنة اللي فاتوا، حتى الإعلام والمذيعين، وكأن خلاص اللي بيغني شاف كل حاجة ومابقاش يستغرب أي شيء يحصل، حتى لو شاف ديناصور بيشرب مخدرات ع الناصية!

الأغنية متصورة فيديوكليب بمشاهد رمزية وشغل جرافيك شبابي ارتجالي، وصلت 4 مليون مشاهدة، وحتى على اليوتيوب في قناتهم الرسمية فيه 3 مواضع محجوبة من الأغنية، لكن المعنى واصل في الحوار مع أبو الهول لما قال له ( لولا دماغي اللي ساحت ومناخيري اللي راحت كنت سمعتك صوت جديد).

 

7- السكة شمال في شمال… كلمات أمير عيد وألحان كايروكي

 عمرو قطامش شاعر شبابي اتشهر وقت الثورة وغنى باسمها كتير، رجع غنى بعدها وقال (خلاص آمنت بالوحلة وبكرة الجاي مش أحلى)!

 برضه كايروكي غنوا في الأول وقالوا (السكة شمال واليمين.. مش شغال على فين رايحين)، وبعدها رجعوا في 2017 وقالوا (السكة شمال في شمال واليمين اختفى)، والأغنية برضه اتمنعت من الرقابة ومشاهداتها قربت على 20 مليون.

نمط الأغنية أقرب للفرق الشعبي وجو المونولوج السريع، وده كان مناسب للكلمات رغم أن صوت أمير عيد المميز يبان غريب في الأول على اللون ده، كلماته ضرب نار في كل حاجة، وبتقول إن خلاص لازم نبعد لأن السكة شمال ع الآخر (ابعد عن السياسة نام وبلاش غلاسة، دي مواضيع صعبة وحساسة، وأنت مالكش عازة، آخرك دمعة وجنازة الواطي بقى عالي والرخيص بقى غالي).

 

8- الكيف… كلمات أمير عيد وألحان كايروكي

31 مليون مشاهدة حتى الآن، والكيف نزاهة لو معاك تمنه على رأي المعلم سليم البهظ، ده اللي كايروكي قالوه في أول الأغنية مع طارق الشيخ المعروف بتاريخه في الغنا الشعبي، ودي مش أول مرة للفريق يغنوا شعبي بإستضافة واحد من الفطاحل، لأنهم سبق وعملوها مع عبد الباسط حمودة في أغنية (غريب في بلاد غريبة).

حتى أغنية زي دي عن المخدرات كانت هتتمنع من الرقابة لكنهم رجعوا في كلامهم، والحقيقة أن الكلام عبر جدًا عن حال المدمنين ( يخرب بيتك يا كيف ويخرب بيت معرفتك)، وفي الآخر يقولوا ( وسيجارة جابت جوان وجوان جاب حباية، حباية جابت شريط وانتهت الحكاية). 

واضح أن كايروكي بيقدروا كل الفئات، وحتى اللون الشعبي قدموه بأسلوبهم اللي ممكن ناس تانية تشوفه ابتذال واستغلال للموجة وبس.

 

9- عم غريب… كلمات حازم ويفي وألحان كايروكي

 

 

من ساعة رمضان اللي فات، وتتر مسلسل واحة الغروب في ذهن كل اللي سمعوه، واسم (وائل الفشني) المطرب اللي غناه ازداد شهرة من بعده في كل السوشيال ميديا، ده أكيد كان دافع لكايروكي أن الفشني يكون ضيفهم التالت الألبوم ده في جو أقرب للتراث الصعيدي اللي قدمه في واحة الغروب، المرة دي الجو شعبي طالع من قهاوي الحسين والسيدة.

عم غريب أغنية مصرية جدًا بكلماتها وألحانها، بدأت بـ (يا ليل) وكملت وصف في المصري الكادح الصابر اللي بيمثل 90 مليون، رغم كل التعب والشقا بيرضى وآهي ماشية، أكيد هتلاقي عم غريب جارك أو أبوك أو أنت حتى لما تكبر (عم غريب واخد الدنيا زي ما تجيب ولا ماسك فيها ولا متبت وتشوفه يضحك وينكت ويقولها أمرك ده عجيب).

 

10- آخر أغنية… كلمات أمير عيد وألحان كايروكي

(كلامي مش ضد النظام… فقط كلامي ضد العبيد)، ده اللي قاله أمير في الأغنية اللي الرقابة اعترضت عليها لرابع مرة، رغم أنها من أواخر 2016، كايروكي عاوزين يوصلوا رسالة صريحة، أنهم زي ما غنوا (صوت الحرية) زمان، بيقولوا المرة دي ( لو دي آخر أغنية ليا هفضل أغني عن الحرية).

يمكن فعلًا زي ما اتردد كلام أن الفريق كان عارف أنه هيتمنع من الرقابة، لكنه أصر يكمل في طريقه قدام جمهوره، الكلمات كلها هجوم على المجتمع تاني، هجوم صريح ممكن فعلًا يتفهم غلط.

(وتقاليد محتاجة تجديد والتاريخ عمال بيعيد فيه حرب ضد الحرية، والحرية ممنوعة كل العقول الرجعية كلمتهم هيّ المسموعة اتربينا علي أن الحيطان ليها ودان طب انزل بالمزيكا سمعهم بالفم المليان لو دي آخر اغنية ليّا، هفضل أغني عن الحرية قولوا معايا بصوت عالي).

 

11- نقطة بيضا 2… كلمات أمير عيد وألحان كايروكي

أيقونة الألبوم وبدايته، قرر الفريق ينهي بيها كمان، نفس الكلمات بلحن وتوزيع جديد، بشكل سريع وكأن النقطة البيضا وضحت ولمعت قدام صاحبها، إيقاع شبيه بموسيقى الميتال يحركك ويحمسك.

برضه صوت عبد الرحمن رشدي حاضر في نهاية الأغنية، لكن المرة دي حضوره أقوى فعلًا، حتى طبقة صوته أعلى والتصوير مركز على دخلته أكتر وأكتر، ابتهاله ماشي مع اللحن بشكل ملائم رغم اختلافه عن باقي جو الأغنية، وكمان شارك الموسيقى الحديثة بابتهاله زي الشيخ (زين محمود) ما عمل في أغنيته المشهورة (يبكي ويضحك)

 

 

وفي الختام، نقدر نقول أن كايروكي نجحوا بشكل كبير في دولتهم الإفتراضية، النت بس وجمورهم اللي بيستهدفوه من 10 لـ 40 سنة حسب تصريحهم، والألبوم نقطة بيضا في جوانب كتير لكنه أكيد نقطة سودا في نظر ناس كتير في نفس الوقت، أنت مين فيهم على كده؟!