شعبان عبد الرحيم: شربت مخدرات بسبب حزني على مراتي فدخلت العناية المركزة
Cairo 360
كتبت:سارة نبيل
اختلاف صوت وأغاني شعبان عبد الرحيم كانوا السبب الرئيسي في نجاحه على الرغم إنه مطرب للحن واحد، وقدر إنه يبقى من أشهر وأنجح مطربي الأغنية الشعبية في مصر والوطن العربي واللي صوتهم وأغانيهم في كل شوارع القاهرة وحاراتها.
وفي حواره مع كايرو 360 وداخل الاستديو الخاص به في القاهرة فتح شعبان عبد الرحيم قلبه لينا وحكى لنا عن ولاده ومراته ووالده وكمان تهديدات داعش له، وتفاصيل تانية هتعرفوها في السطور الجاية.
إيه أصعب أزمة مريت بيها في حياتك؟
أصعب مشكلة قابلتني كانت زمان وأنا شاب صغير، وقتها ماكنتش مشهور أوي ومش لاقي مكان أعيش فيه فسكنت في منطقة زراعية إسمها بهتيم، وقعدت 14 شهر كل شهر في أوضة لإنه ماكنش معايا فلوس أدفع الإيجار فكان صاحب البيت يقولي لو مش معاك إمشي فأضطر أعزل لأوضة جديدة وهكذا لمدة 14 شهر، وكان عزالي كله حصيرة ووابور جاز ومراتي، فكنت كل ما أضطر أعزل أخدهم وأمشي على الأوضة الجديدة، والفترة دي عمري ما هناسها لإنها كانت أصعب فترة عدت عليا في حياتي.
إحساسك كان إيه لما فقدت زوجتك وصدمة موتها خدت وقت قد إيه عشان تفوق منها؟
لحد دلوقتي أنا لسة مافوقتش من صدمة موت مراتي، مع إن عدى أكتر من 3 سنين على موتها بس أنا هفضل حزين عليها لحد ما أموت لأنها شقيت معايا، وبصراحة كل ما أفكر إني أتجوز ست تانية عشان تعيش معايا وتخدمني ألاقيني إفتكرت مراتي وعيطت فأقول لا أنا مش هتجوز تاني، وإن شاء الله مش هتجوز لإني وعدتها وقلت لها “حتى لو سيبتيني مش هتجوز غيرك” وأنا عند وعدي ليها.
الناس هاجمتك كتير في بداياتك ووصفوا أغانيك بـ “الهابطة”، كنت بتزعل من الهجوم ده؟
ناس كتير هاجمتني وهاجمت الكلام اللي بغنيه، بالذات الصحفيين وجرايد كتير كتبت إني بغني “كلام هابط” بس دي كانت مرحلة معينة من حياتي الحمد لله عدت ودلوقتي فهموا كلامي، لإني عمري ما غنيت كلام تافه أو ملوش هدف، كل كلامي توعية للشباب زي مثلاً “هبطل السجاير”.
اتعرضت لأزمة صحية قوية جداً دخلت بسببها العناية المركزة، إيه سبب الأزمة دي؟
بعد موت مراتي كنت حزين جداً ونفسيتي متدمرة وبشرب سجاير كتير أوي وكانت سجاير فيها مخدرات ووصلت إني بشرب 5 علب سجاير في اليوم، ودا طبعاً قضى عليا، بس الحمد لله خفيت دلوقتي وبطلت السجاير وبروح الجيم كل يوم وبجري، وحتى الشاي بشربه خفيف.
كنت تتمنى مين يشوف نجاحك وشهرتك ويفرح باللي قدرت توصل له؟
كان حلمي إن والدي الله يرحمه يشوف اللي أنا فيه ويفرح بنجاحي وشهرتي، وهو مات قبل ما إتشهر للأسف، بس أمي الله يرحمها شافت نجاحي وحققت لها كل اللي كانت بتتمناه قبل ما تموت.
إيه الأغنية اللي عملتها وماحققتش نجاح زي ما كنت بتتمني ؟
فيه أغاني كتير منجحتش معايا لكن أنا متعود أعمل أغنية لكل حدث، فالأغنية بتتشهر وقت الحدث اللي اتعملت علشانه وتاني يوم خلاص مبيبقاش ليها لازمة، بس أنا ليا أغاني سابت علامات زي “أحمد حلمي إتجوز عايدة”، وأغنية “خيشة” وأغنية “بكره السحاير” و”بكره إسرائيل” اللي شهرتني في العالم كله مش بس في مصر.
أغانيك السياسية زي “بكره إسرائيل” عملت ضجة كبيرة، هل اتسببت لك في مشاكل مع دول معينة زي منعك من السفر ليها مثلاً؟
الأغاني اللي اتسببت في مشاكل هي الأغاني اللي غنيت فيها ضد أمريكا وإسرائيل وداعش والمشاكل دي ماكنتش في مصر، بس الناس دي متهمنيش في حاجة اللي يزعل يزعل وأي حد يزعل مصر أزعله، وداعش هددوني على فكرة بعد ما عملت أغنية هاجمتهم فيها، بس أنا مابخافش من الكلام دا يقولوا زي ما هما عايزين إحنا في مصر ومحدش يقدر ييجي ناحيتنا.
في بداياتك لما كنت بتحاول تسمع صوتك للمنتجين وتقنعهم ينتجوا ليك، حد صدمك وقال لك ماتغنيش تاني؟
مرة صديق ليا خدني لواحد إسمه الأستاذ مهدي خميس عشان يعمل لي أغنية وأول ما سمعني قال لهم لا مينفعش مشوه عايز يغني إزاي ده؟! فنزلت من المكتب وقعدت أعيط، بس صاحبي قالي ولا يهمك هو مفيش غيره يعني؟ هوديك لحد تاني، وفعلاً وداني لأستاذ وهبة الشاذلي اللي عملي أغنية “أحمد حلمي إتجوز عايدة” والراجل ده ليه فضل كبير عليا وهو اللي علمني الغنا، وكان جايبلي كورة صغيرة في الأستديو عشان يلعب معايا شوية كل يوم الأول وبعد كده يعلمني أغني.
هل مريت بمشاكل مادية بعد شهرتك؟
لما بكون مش معايا فلوس بتبقى أكبر أزمة لإني ببقى متضايق وأقعد أزعق لعيالي، والناس مش هتصدق إني ممكن يعدي عليا أيام مامعييش فيها فلوس، بس أنا أكتر من نص الأفراح اللي عملتها في مصر أو برا كانت ببلاش ومن غير فلوس “جدعنة يعني” لإني اللي بيهمني هو حب الناس وهو اللي بيفرحني أكتر من الفلوس، أنا شغال لحد دلوقتي بحب الناس واحترامهم ليا.
بتزعل لما الناس بتتريق على لبسك؟
لا مش بزعل براحتهم يقولوا زي ما هما عايزين أنا بلبس حاجات هما ميعرفوش يلبسوها لإني بلبس بدل غالية وبجيب قماش أغلى من قماش البدل الشيك السودا اللي الشباب بيلبسوها في الأفراح، كنت بجيب زمان قماش من الوكالة وأفصله دلوقتي بجيبه من الكويت والسعودية والإمارات.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
