إستاكوزا الدولي.. أكلة سمك عالمية في العين السخنة
استاكوزا الدولي العين السخنة مطاعم أسماك مطاعم سمك في العين السخنة منيو استاكوزا الدولي
Cairo 360
رنا شرف
في الصيف كلنا بنبقي عايزين نغير جو ونروح البحر ونتعرض للشمس، وده لإن الصيف بيحب التغيير، علشان كده قررنا نروح مكان جديد بعيد عن القاهرة، وهو مطعم إستاكوزا الدولي، الموجود في قلب العين السخنة، واللي مسعنا إنه مكان مميز لعشاق السمك.
أول ما وصلنا المكان قابلتنا بجعة جميلة موجودة خارج المطعم، شكلها مبهج، وحقيقي عاملة جو جميل في المكان.
لما دخلنا المطعم عجبنا إن المكان شيك والترابيزات والكراسي مريحة ودي حاجة جميلة لإنها بتقول إن القعدة هتكون حلوة! كمان لاحظنا نظافة المطعم ودي كمان حاجة مهمة وتطمن.
فريق العمل في المطعم كان متعاون وفيه ابتسامة جميلة على وجوههم كلهم.
ندخل بقى على المهم.. الأكل!
نزلت لنا سلاطات كالعادة في مطاعم الأسماك، طحينة وبابا غنوج وباذنجان مخلل وسلاطة خضراء، وكانوا حلوين بس الكمية مش كتير للأسف.
طلبنا جمبري مشوي وجبنا 820 جرام، سعره 325 جنيه، مع أرز سعره 15 جنيه. الجمبري حلو وفريش وجودته عالية، وعجبنا طعمة جدًا، أما الأرز فكان جميل، والبهارات مظبوطة وعظمة ومتسوي حلو، بس الكمية صغيرة للأسف.
كمان طلبنا سمكة دراك، والنوع ده مشهور جدًا في البحر الأحمر بس، والسمكة فعلًا كانت حلوة، الطعم جميل والتوابل مخلياها جميلة، والتسوية مظبوطة. لكن ماكنتش كبيرة من حيث الحجم، وسعرها 175 جنيه.
كمان جربنا الجندوفلي عندهم مع السبيط. والجندوفلي كان حلو، والسبيط كمان كان مميز ومعمول حلو.
ولو روحت إستاكوزا وماكنتش من عشاق الأسماك، ممكن تكتفي بطلب سبيط وجندوفلي مع سلاطات خفيفة، أكيد هتحب التجربة.
سعر الجندوفلي عندهم للنص كيلو 100 جنيه، والسبيط 335 جرام بـ115 جنيه.
التجربة بشكل عام عالمية.
العنوان: إستاكوزا الدولي هتلاقوه في العين السخنة، وبالتحديد في قرية مون فيو بجوار أوشن باو.
ولمعلوماتك؛ إستاكوزا موجود كمان في القاهرة، وبالتحديد في القطامية داخل بنزينة وطنية.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
