The Definitive Guide to Living in the Capital , Cairo , Egypt

لو سألناك يعني إيه مطبخ عالمي بالنسبة لك..  غالبًا هتكون إجابتك إنك تجرب الأكلات والأطباق المختلفة، من أول الأكل الإيطالي لحد الأكل الأمريكي والفرنساوي متجمعة لك في مكان واحد، هنقولك صح، بس النهارده فريق #كايرو_360 جاي يقولك كمان إزاي مهم إن الأصناف والأكلات دي تتنفذ صح علشان تبسط اللي بياكلها، وعلشان كده اختارنا لك الأفضل في مطاعم الأكل العالمي لسنة 2021.

اعرف معانا المطاعم اللي فازت في فئة أفضل المطابخ العالمية فى جوائز اختيارات محرري كايرو 360 لسنة 2021:

كريف – Crave

بتحب الأكل المعمول بحرفية ومزاج؟ يبقى لازم تحط “كريف” في قائمة الأماكن المفضلة بالنسبة لك، وده لإنه من الأماكن القليلة اللي لسة محافظة على مستواها اللي بدأت بيه، ومش بس كده، ده كمان بيطور دايمًا من نفسه علشان يكون أفضل.

كولينا –Culina

في المكان ده، وبكل سهولة واحترافية، هتلاقي أكتر من مطبخ، هتبتدي بأنواع الباستا، وهتعدي على الأكل الهندي، ولو بتحب السوشي يبقى جيت المكان الصح.

كازلاك – Kazlak

السعادة مش هتفارقك طول ما أنت في “كازلاك” لمجرد الطريقة والجودة اللي هيتقدم بيها الأكل، والحرص على تقديم كل تفصيلة بالشكل اللي يجب أن يكون، واللي يليق بيك وبضيوفك.

مو بيسترو – Mo Bistro

تجربة “مو بيسترو” تجربة مش هتكرر كتير في عالم المطاعم العالمية، وده لإنهم هيبهروك بتنوع الأطباق مع الجودة المختلفة والمميزة لكل حاجة جربناها هناك.

كريمزون بار أند جريل – Crimson Bar & Grill

المولتن كيك والازانيا والستيك من التجارب اللي كان ليها بصمة مع فريقنا في “كريمزون بار أند جريل” وحقيقي حبينا كل حاجة في المكان، وبنعتبره من أماكنا المفضلة اللي عارفة كويس جدًا هي بتقدم إيه.

تيدز – Ted’s:

صدقني لو أنت مش من سكان مدينة نصر، هتروح مخصوص “سيتي ستارز” لمجرد إنك تضرب بيتزا أو مكرونة أو تحلي في “تيدز” لإن ببساطة “تيدز” عنده القدرة إنه يبهرك بوصفاته ومستواه الثابت.

.

ذا سموكرى  – The Smokery

السالمون حكاية من حكايات ألف ليلة وليلة في “ذا سموكري” ولازم تجربه، المكان بشكل عام مع طريقة التقديم والأطباق المغرية هتخليكم مش عاوزين تروحوا.

يو بيسترو&  بار – U Bistro & Bar:

القعدة الحلوة بتفتح النفس، أهو المثل ده تحديدًا بينطبق على “ويو بيسترو” لإنه مش بس بيقدم أكل ممتاز، لكن كمان ديكور المكان مختلف وجوه دافي ولذيذ.

أبيريتيفو  – Aperitivo

 كل فترة، بنعدي على “أبيرتيفو” علشان نستمتع بكل الأكلات الشهية اللي بيقدمها، والقعدة المريحة اللي هناك، واللي بكل بساطة هتسيب علامة في حياتك من أول زيارة للمكان.

 

Frank & Co:

من المطاعم اللي بتقدم أكلات عالمية بشكل مختلف ومميز، سواء في شكلها أو طعمها، ده غير إنه متخصص ومتميز في أكلات السي فود.

 

Good Stuff Eatery:

“برجر بالمارشميلو” مع “تين شيك”.. اختراعات جديدة بيقدمها المكان، ومش بس جديدة في أفكارها، لا دي كمان جديدة في طعمها، حاجة كده مش هيفهمها غير عشاق البرجر.

 

وان أوك – One Oak

عشاق السوشي والستيك يجمعوا هنا في “وان أوك” مع إنه صعب تجمع بين صنفين صعب جدًا تنفيذهم صح، لكن المكان ده بيبدع فيهم، وبيقدم أنواع مختلفة هتخليك حاسس إنك في حلم.

 

كاسبر & جامبينيز – Casper & Gambini’s:

مطعم ومقهى عالمي، وله فروع في مجموعة كبيرة من العواصم العربية.. تجربة الأكل فيه كانت راقية جدًا، والخدمة على أعلى مستوى، مع الاهتمام بالتفاصيل.

 

لا تابرنا – La Taberna :

المكان مميز مش بس بأصنافه وتنوع المنيو، لكن كمان بأجواءه الرومانسية اللطيفة.. وطريقة تقديم أطباقه، واللي تعتبر في حد ذاتها تجربة جديدة في كل مرة بينزلك فيها طلبك.