The Definitive Guide to Living in the Capital , Cairo , Egypt

مفيش أحلى من ساندوتش برجر على مزاجك، مع بطاطس مقرمشة. صحيح ده أصل المطبخ الأمريكي، بس أماكن قليلة اللي تعرف تقدم الأكل ده زي ما قال الكتاب. وإحنا اخترنا لكم أفضل مطاعم المطبخ الأمريكي، علشان تستمتعوا بها طول السنة.

تعالوا نعرف الفائزين في فئة أفضل المطابخ الأمريكية، في جوائز اختيارت محرري كايرو 360 لعام 2022:

بوتشرز برجر – Butcher’s Burger

من أهم الأماكن المتخصصة في ساندوتشات البرجر، وأبدعت فيه. الساندوتش حجمه كبير، لدرجة إنك صعب تقطم منه بسهولة. وغرقان صوص. فروعه كتير ومستمر في إسعاد الزبائن.

ويلز كيتشن –  Willy’s kitchen

هو ملك البرجر اللي نجاحه باين في كل فروعه. وساندوتشات الدجاج كانت اختيار رائع منه. واحد من أفضل الأماكن اللي لسه محافظة على مستواها.  

لوسيلز – Lucille’s

في فرع المعادي البرجر عبقري، وطعم اللحم غني. ويا سلام على إضافات البصل المحمر والخس والصوص. اللي بيجربه مرة، لازم يرجع له تاني.

تشيكن أند ريبس – Chicken & Ribs

عنده اختراعات كتيرة حلوة جدًا،.غير البرجر الوهمي، فيه تشيكن أند وافل، بيف ريبس، وباربيكيو ريبس ناتشو. أكلات أمريكية مختلفة ماتتفوتش.

لوكا ستيك هاوس – Lucca steakhouse

أحسن مكان تاكل فيه استيك معتبر بجودة ممتازة في الشيخ زايد. حاجة كده شغل فنادق. وفي أصناف تانية طبعًا، بس الاستيك هو الملك.

فود جن – Food Gun

بطعم البرجر المميز عنده، ووصفاته اللي تاخد العقل. فود جن مش بس مطعم، ده مجتمع متكامل. معمول على حسب دماغك انت.

ديرتي بيرد – Dirty Byrd

عنده منيو مليان كل سندوتشات البرجر، اللي تعرفها واللي ماتعرفهاش. البرجر عنده مش مجرد أكلة، دي تجربة مختلفة بتعيشها كل مرة مع كل قطمة.

بافلو وينجز & رينج ر. بلو – Buffalo Wings & Rings R.blue:

اختراعات لا نهائية، وطعم لا يقاوم.. من غير كلام كتير ممكن تجرب طبق سبانخ الخرشوف مع رقائق التورتيلا المقرمشة، والطعم هيوصلك، لو ما بتحبش السبانخ هتلاقي أصناف تانيه كتير.

بينج – Binge:

المكان ده مش بس مميز بأكله المختلف في طعمه وطريقة عمايله، ولا المنيو المليان واللي بيرضي كل الاذواق، لأ مميز كمان بالقعدة والجو المختلف اللي هتاخد فيه وجبتك المفضلة وانت مبسوط.

 

كازلاك – Kazlak:

حرفيًا هتحس إنك بتاخد غطس في أطباق عالمية، واللي هيساعدك على ده كمان الأجواء الأكثر من رائعة واللي بيغلب عليها الفن المصري في كل ركن.. المكان بشكل عام ينفع لعشاء هادي ورومانسي لشخصين، أو تتجمع فيه مع أصحابك وتطلبوا بيتزا لذيذة، ولو كنت واكل وعاوز تهضم أو تحلي، فأنت اخترت المكان المناسب.

 

لونج هورن – longhorn:

مفيش صنف في المنيو ده ينفع يتساب، من أول التاكو الرهيب، لحد واجبة الباربكيو تكساس الأصلي، واللي بيستخدم فيها لحوم بتتعمل بطريقة بتتعمل لأول مرة في الشرق الأوسط وأفريقيا.

ذا أو جي بيرجر – The OG Burger:

الناس دول بيعتبروا نفسهم أصل البرجر والبطاطس المقلية والأجنحة والميلك شيك، وده ببساطه اللي هتحسه فعلًا أول ما تدخل عندهم وتجرب أكلهم.