البلدي يوكل.. 5 مطاعم بتقدم أكل بيتي في القاهرة
أحسن حواوشي أفضل لحوم أكل بلدي أكل بيتي أكلات مصرية
Mohamed Talaat
الأكل بره البيت تجربة محببة لنا كلنا، لكن مع ارتفاع الأسعار أصبحنا بنأخد بالنا جدًا هناكل ايه وفين، ولازم الجودة تكون مقابل السعر، وكلنا متفقين أن الفاست فوود من الأكلات غير الصحية، علشان كدة بنحب أكثر المطاعم اللي بتقدم أكل بيتي مميز وبجودة تستاهل التجربة، وده اللي هنعرفه من خلال 5 مطاعم بتقدم أكل بلدي بطعم وجودة البيت وأسعارهم مقبولة خاصة أن الأكل يستاهل ومتخدم عليه.
صبحي كابر
بدء مسيرته بعربية في منطقة الساحل – روض الفرج، وحاليًا عنده مبنى من 3 أدوار بيقدم فيه خدمة الأكل، وكل الأكلات عنده بلدي وكمان عنده تنوع كبير في الأصناف يناسب كل الأذواق، ومعروف بالملوخية المميزة بتاعته وطاجن الفريك بالحمام.
العنوان: 151 شارع عبيد – الساحل – شبرا مصر
رقم التليفون: 16640
وتقدروا تعرفوا أكتر عنهم من خلال صفحة الفيسبوك من هنا.
الربيع
حواوشي الربيع من أهم المطاعم اللي بتقدم أكلات بلدي بطعم بيتي في القاهرة ويمكن في مصر كلها، والجودة عندهم عالية والخدمة ممتازة ولهم فرعين الأساسي في امبابة والثاني في الشيخ زايد واحنا دايمًا بنفضل فرع امبابة في تجربتنا، وأجمل حاجة بناكلها من عندهم الكوارع والعكاوي والفريك، وفي العموم أكلهم جودته فوق الممتازة.
العنوان: شارع محمد الإمبابي – مدينة التحرير – إمبابة.
رقم التليفون: 17198
وتقدروا تعرفوا أكتر عنهم من خلال صفحة الفيسبوك من هنا.
حجوجة
البداية بتاعة مطعم حجوجة كانت من أقوى البدايات لأي مطعم وسمعته في جودة الأكل معروفة، وقفل لظروف ما ورجعوا تاني بمكان أكبر وأفضل، ولكن اختلفت الآراء حول قوة جودة الأكل بتاعهم زي زمان، ولكن الفترة الأخيرة هما عاملين ريمونتادا وراجعين بقوة يقولوا “على الأصل دور” بجودة عالية للمنافسة مع باقي المطاعم.
العنوان: حديقة المدفعية – شارع الصاعقة – طريق السويس.
رقم التليفون: 01280055200
وتقدروا تعرفوا أكتر عنهم من خلال صفحة الفيسبوك من هنا.
قصر الكبابجي
خلينا نقول أن ده مطعم “الأكابر” بديكوراته وخدمته وأسعاره كمان، ولكن المهم أنهم بيقدموا جوجة عالية من الأكل ورفاهيته، ومن كتر شهرته هتلقوا عندهم دايمًا نجوم مصر والوطن العربي، وهما شاطرين قوي في التسويق لنفسهم عن طريق بلوجرز عالميين، وهما عندهم فرعين واحد في التجمع والتاني في زايد.
العنوان: شارع التسعين الشمالي بجوار بنك بلوم مصر – القاهرة الجديدة.
رقم التليفون: 15959
وتقدروا تعرفوا أكتر عنهم من خلال صفحة الفيسبوك من هنا.
الإخلاص فتحي
من المطاعم اللي مش واخدة حقها اللي تستحقه ولكنهم بيقدموا جودة ممتازة في الأكل البلدي بطعم البيتي واحنا بنرشح المطعم ده لأنه من الاماكن المميزة جدًا في الطعم وخاصة أنهم بيعملوا سمان مشوي طعمه “معسل” والمشويات بتاعتهم تتبيلتها حلوة، وسعرهم مناسب جدًا.
العنوان: 94 شارع ترعة جزيرة بدران – روض الفرج – شبرا.
رقم التليفون: 01020208297
وتقدروا تعرفوا أكتر عنهم من خلال صفحة الفيسبوك من هنا.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
