The Definitive Guide to Living in the Capital , Cairo , Egypt

ساندويتشات البرجر والستيك والبطاطس المقرمشة من مميزات المطبخ الأمريكي اللي مافيش حد يقدر يقاوم سحر طعمها، خاصة لما تكون معمولة بحرفية ومزاج. فتكون الوجبة كبيرة وطعمها يجنن وسعرها معقول، ولأن الحاجات دي كلها بقى صعب تكون موجودة في مكان واحد أخترنا لكم أفضل مطاعم المطبخ الأمريكي لعام 2017 من وجهة نظرنا واللي بنرشحها لكم أنكم تستمتعوا بها طول السنة على ضمانتنا لأننا جربناهم كلهم.

الفائزين في فئة أفضل المطابخ الأمريكية في جوائز اختيارت محرري كايرو 360 لعام 2017:

 

فات كاو – Fat Cow

لكل عشاق البرجر اسمعوا وعوا! لسه فيه مكان في المعادي بيقدم برجر بحرفية عالية وتتبيلته مثالية، ده غير البطاطس المقرمشة والكبيرة اللي بيتميز بيها المكان، وإمكانية أنك تكون الساندوتش بتاعك بنفسك. فات كاو فتح من سنين قريبة بس قدر يثبت أن المهنية والحرفية هي اللي بتحدد شهرة المكان وإقبال الناس عليه.

مينس – Mince

فكرة المطعم اللي بيكون له فروع كتير بتقدم نفس الجودة مش دائمًا بتلاقي نجاح، لكن مينس قدر بساندوتشاته المميزة والمقبلات بتاعته اللي ما تتقاومش، يعمل حاجة فريدة لمكان مش هتقدر تخرج منه غير وأنت مجرب كل حاجة، وتختم وجبتك بالـ French Toast اللي طبقاته المتزينة بالآيس كريم تخليك تقيم عند مينس لحد ما تهضم كل اللي أكلته.

ويلز كيتشن – Willy’s kitchen

النجاح الكبير اللي حققه فرع مدينة نصر استمر في فرع الدقي والتجمع وبقى معروف بجمال ساندوتش البرجر اللي محشي جبنة من جوه وبتكون بكمية كبيرة ولذيذة، ده غير أنه تفوق على نفسه في ساندوتشات الدجاج كمان فبقى مجمع الحلو ما بين البرجر والدجاج والتشيلي فرايز العظيمة.

لوسيلز – Lucille’s

فطار لوسيلز من المعالم المعروفة في المعادي ده غير أنه بيقدم برجر وستيك وأكلات مختلفة، بس أكتر حاجة بنحبها عنده هي البان كيك.

سولت – Salt

لما نحب نتكلم عن الحاجة اللي معمولة بمزاج يبقى لازم نتكلم عن سولت اللي بتعتق اللحمة لمدة قبل ما يستخدمها علشان يكون طعمها قوي، غير الوافلز اللي بيقدم فيها الساندويتشات، تجربة فريدة لمزيج من النكهات المميزة والمختلفة.

ذا كيوسك – The Kiosk

من الأماكن اللي صعب ننسى طعم البرجر الشهي فيها ذا كيوسك في مصر الجديدة، واللي قدم أكتر من ساندوتش مذهل في المنيو الخاصة به، غير الحرفية اللي بيعمل بيها البطاطس بحيث ماتبقاش مزيتة أو محروقة. من المؤكد أن المكان ده مابيعملش حاجة غير وهو راضي 100 % عن جودتها.

فيرسال – Versal

من الأماكن اللي لسه فاتحة قريب وبتتميز بكمياتها الكبيرة في كل حاجة، كمان بتعمل كمبو من نوع مختلف زي أنك تطلب ساندوتش برجر وبطاطس وتحبس بكوباية شاي بالنعناع، ده غير الوجبات العادية ووجبات الأطفال.

ستاكد – Stacked

 ستاكد  من الأماكن اللي لسه فاتحة جديد، وبيقدم الساندويتشات مع شرائح الدجاج أو اللحم وسط أكثر من طبقة من التوست الأبيض والبني، مع إضافات كتير مبهرة، غير أنه أسامي الساندوتشيات مستوحاة من شخصيات في السينما والإضافات نفسها في كل ساندوتش لا تقاوم.

مبروك لكل الفائزين!