الأكل الهولندي معروف عنه التقليدية في مكوناته، وساعات بيعملوا حاجات غريبة شوية (زي كمية المايونيز المهولة اللي بيحطوها على البطاطس)، بس من أكتر الأطباق المعروفة عند الهولنديين كمان طبق السترو بوافل اللذيذ، فكان طبيعي أول لما نعرف إن داتش ديلايتس فتح في مصر نزورهم على طول.
داتش ديلايتس عبارة عن مخبز متحرك على شكل تريسكل، وزيارتنا كانت لمكانهم المؤقت في أركان بلازا الشيخ زايد. شكل داتش ديلايتس لطيف جدًا بالسقف الأزرق والبرتقالي الملفت للانتباه، ولبس الجرسونات الجامد وطبعًا تغليف منتجاتهم التحفة.
المنيو فيها أحجام متنوعة من الستروبوافل، وكمان فيها بوفيرتس. لو ماكنتش عارف إيه هي البوفيرتس poffertjes، فالفكرة ببساطة ميني بان كيك عجينتها معمولة من الخميرة مع القمح الأسود، والتوليفة دي بتعمل للبوفيرتس ملمس مميز. الإضافات عند داتش ديلايتس كتيرة ومتنوعة تشمل نوتيلا وفاكهة، بس إحنا سمعنا كلامهم وطلبنا بوفيرتس كلاسيك (30 جنيه).
البوفيرتس عبارة عن عشر قطع عليهم زبدة سايحة وسكر بودرة، وبيتقدموا على طبق كرتون صغير.مافيش كلام إن العجينة الاسفنجية المدهشة كانت خفيفة ومنفوشة، بس سكر البودرة مكانش مرشوش كويس وكان متكتل في أجزاء معينة. البوفيرتس كان محتاج حتة زبدة طرية عشان ياخد العلامة الكاملة.
طلبنا كمان 8 قطع ستروبوافل (60 جنيه) وسط نأخذهم معانا في السكة، وبصراحة كانوا قمة في الجمال، وأحلى حاجة فيهم إن سكرهم مظبوط ومافيش نكهة الحلويات الصناعية اللي بنحسها في حلويات السوبر ماركت.
جربنا كمان عندهم الميني ستروبوافل (30 جنيه) فيهم قطع مارشملو بصوص فراولة، بس طلعوا أنشف شوية. الفكرة أنهم ممكن يعملوا فكرة مبتكرة وهي تسخين قطع المارشملو ويطحنوها بين جزئين الستروبوافل وبكده يعملوا نسخة هولندية جامدة من S’mores.
من غير كلام كتير، مش هتلاقي في أي مكان بوفيرتس وستروبوافل في القاهرة أحلى من عند داتش ديلايتس. مع كل قطمة هتحس أنك بتاكل حاجة بيتي نظيفة، وكمان شكل التريسكل والتغليف تحفة، بس الأسعار هناك غالية شوية.
أكتب تقييم
مقترح
الحياة في كايرو
قانون الإيجار القديم بيتغير؟.. كل اللي محتاج تعرفه عن التعديلات الجديدة وأثرها عليك!
أزمة الإيجار القديم إيجار الأشخاص الاعتبارية +8
معالم وسياحة
