سعرهم على قد الإيد… 5 مطاعم في الدقي لازم تجربهم
أكل رخيص الدقي رضوان سمسمة طازة عز المنوفي كشري التحرير مطاعم مطاعم قد الميزانية
Mohamed Talaat
-
الدقي من المناطق الحيوية اللي فيها كتير من المصالح الحكومية والوزارات والشركات الخاصة، وكتير مننا بيخلص مصالحه هناك، علشان كده إحنا في كايرو 360 قررنا نرشح لكم مجموعة من أهم المطاعم اللي لازم تجربوا الأكل عندهم.. وراعينا في اختياراتنا السعر المناسب.
رضوان
دا مطعم بيقدم لك اختيارات كتير من الأكل، وتقدر تروح في أي وقت لأنه شغال 24 ساعة، وفيه كل ما تحتاج إليه من فول وطعمية وأومليت للافطار، ومحشي ومشوي وشاورما وخضار وفراخ وسلطات، وحتى الأسماك، للغداء والعشاء، مش هتغلب إنك تلقى في المنيو بتاعهم اللي نفسك فيه، وإحنا بنرشح لك تجرب الممبار بتاعهم الجبار بـ26 جنيه للربع كيلو، ووجبة الموزة الضاني، اللي بـ96 جنيه، وما تنساش أن عندهم شيف سلاطة من أفضل ما يمكن وله نفس مميز فيها.
رضوان عنوانه 109 شارع التحرير، تحت كوبري الدقي بالظبط، ورا بنك مصر.
19285
كشري التحرير
ومين فينا م بيحبش الكشري، وخاصة كشري التحرير اللي معروف بجبروت طعمه ، ومزيكة تحابيشه، وعندهم أحجام مختلفة من الأطباق تبدأ من 10 جنيه.
وتقدر تروح لهم في 132 شارع التحرير قدام بنك الإمارات دبي، أو تطلب من عندهم دليفري من الرقم الموحد 19719.
طازة
لما بنروح طازة، بنحتار نختار هناكل إيه، من كتر الاخيتارات الحلوة، بس بنحب نجرب كل مرة حاجة مختلفة، زي طازة بوكس اللي سعره 30 جنيه، ويستاهل إنك تدفع فيه المبلغ ده، بس اعمل حسابك في عيش زيادة، وطبعًا يفضل أنه يكون مشوي مش مقلي، وممكن تاخد سندوتشات برجر اللي بتبدأ من 13 جنيه، أو أسماك اللي بتبدأ من 12 جنيه، ومتنسوش لو عاوزين تشبعوا وتوفروا مع بعض تجربوا وجبة الفراخ المشوية بـ36 جنيه ومن حقك تطلبها “مخلية – بالعضم – ريجيم”.
طازة موجودين جنب كشري التحرير على طول، وممكن تطلب دليفري من رقم 01015083111 , 0237618242، ومهما كان مشغول حاول تاني.
سمسمة
سمسمة يعني الشاورما المظبوطة والمهرية في التتبيلة المميزة، فلو أنت محتاج تاكل شاورما فراخ أو لحمة، مهما حصل انسى أنك ممكن تلقى طعم زي سمسمة، والمطعم دايمًا زحمة ومش هتقدر توصل لطلبك بسهولة خاصة من بعد الساعة 5 مساءًا، وأسعارهم تبدأ من 16 جنيه.
سمسة موجود في 1 شارع الدقي، وتقدر تطلب من عندهم دليفري من أرقامهم 37626165 – 37613522
عز المنوفي
ولو بتدور على حاجة خفيفة وسريعة، عليك وعلى عربية عز المنوفي، وتقدر تاكل من عنده كبدة وسجق مضمونين، والطعم حكاية، ولو حظك حلو هتشوفه وهو بيعمل الأكل اللي بيحط له سمنة بلدي سايحة على الفحم علشان يطلع طعم وريحة حكاية، وسعر الساندوتش 9 جنيه حاليًا.
والعربية موجودة تحت كوبري الدقي “اتجاه مصدق”، جنب شركة بيع المصنوعات وكمان عندهم دليفري من خلال رقم 01270464621
مقترح
الحياة في كايرو
2 جند ولا 6 ولا 7؟ دليلك لاستمارات التجنيد المطلوبة في ملف تقديم الجامعة والمعاهد وإزاي تطلعها أونلاين وتوصلك لحد باب البيت
2 جند 6 جند +13
معالم وسياحة
