The Definitive Guide to Living in the Capital , Cairo , Egypt

بالرغم من المطاعم الكتير في المعادي إلا إن المطاعم المتميزة بس هي اللي بتقدر تثبت نفسها وتبني سمعة كويسة. ومطعم سيزلر من الأماكن المحببة لينا في دجلة المعادي.

بمجرد وصولنا طلبنا  كبداية من وسط قائمة مقبلات كبيرة شوربة كريمة بالدجاج بـ 35 جنيه، وسبرينج رولز بالخضروات بـ 30 جنيه، وسلاطة سيزلار بـ 50 جنيه.

بعد ما نزلوا الكوفر اللي هو عبارة عن توست أبيض وزيتون مفروم وزبدة بحوالي نص ساعة، نزلت المقبلات، الشوربة كانت لذيذة ومتماسكة لكن سميكة جدًا، تناسب أذواق الأكيلة وتبقى صعبة على اللي معدتهم ما بتستحملش الحاجات التقيلة، أما السبرينج رولز فكانت سخنة ومقرمشة والحشوة بتاعتها طرية زي الكتاب ما بيقول، لكن نجم المقبلات بالنسبة لنا كانت السلاطة مع دريسنج الهاني ماسترد وهي عبارة عن خضروات السلاطة مع فاكهة؛ تفاح وكيوي وأناناس، فكانت متناسقة ومنعشة لعشاق الحلو مع الحادق.

بعد حيرة بين أصناف اللحوم والدجاج خاصة إن المكان غير كتير في المنيو بتاعه في الفترة اللي فاتت، قررنا نطلب Fillet Lover بـ 150 جنيه، وGrilled Cordon Bleu بـ 90 جنيه. الفيليه  كانت قطعتين بصوص من أختيارك ، وإحنا أختارنا صوص المشروم، ومعاه مكرونة بينا بصوص الكريمة وذرة، الفيليه جاء لنا في البداية Medium برغم إننا أخترناه Medium well، وبعد ما صلحه الجرسون فضل برضه ني شوية وصعب المضغ وبيمط، أما المكرونة فكانت تقيلة زي شوربة الكريمة بالظبط، يمكن الشيف بيحب يكرم العملاء فبيزود في السمنة واللبن، بس مش كل الناس معدتها تستحمل ده.

نروح على الكرودون بلو، قطع الدجاج كانت مستوية كويس وعصارية، لكن صوص الجبنة كان تقيل جدًا جدًا، حسينا بتخمة شديدة وإضافة ليمون مثلًا كانت هتحسن من الطعم كتير، أو لو أتعمل بصوص أخف.

ختمنا ببراونيز مع أيس كريم بـ 35 جنيه، وليمون نعناع بـ 23 جنيه، البراونيز كان حلو جدًا ومش تقيل وسموزي الليمون نعناع كان منعش.

خلصت زيارتنا للمكان بس خاب أملنا كتير عن أخر مرة وكنا نتمنى إن تغيير المنيو يكون للأحسن، ويزود لنا أنواع متنوعة تناسب كل الأذواق بأكلات خفيفة وشهية للأكيلة ومحبي الأكل الصحي الأتنين. لكن قريب هنروح تاني.