The Definitive Guide to Living in the Capital , Cairo , Egypt

وإحنا ماشيين في شوارع وسط البلد، لفت نظرنا في أشهر عمارة نعرفها هناك “استراند”، مطعم جديد بيعمل طاسات جبنة. على طول جه في بالنا ألبان سويسرا اللي في إسكندرية، فقررنا في نجربه ونقول لكم رأينا.

المطعم منقسم قطعتين، مطبخ، وصالة طعام، في مدخل العمارة في باب اللوق. والديزاين مريح نوعًا ما. قولنا نطلب طاسة “الحرافيش”، ودي عبارة عن مشروم وبانيه وبطاطس بالجبنة السايحة (47 جنيه).

أكتر حاجة كانت ظاهرة لنا هي البطاطس، والمشروم ظهر عن استحياء، أما البانيه فهما قطعتين بالعدد اللي لقيناهم في الطاسة كلها. الغريب أن كان فيه فلفل ألوان مش مدي أي طعم. وكمان تحسه كان عائق في استطعام الأكل لأنه كان ماسخ. بس اتغلبنا على ده وأضفنا كوردن بلو وكاتشب على الأكل.

كمان طلبنا طاسة “جعلوني مجرمًا”، (64 جنيه). ودي كانت عبارة عن تشيكن رول مع بطاطس مع تشكين جريل. والحقيقة إحنا لا شفنا رول ولا جريل، وكل اللي استطعمناه كان قطع فراخ عادية. كمان الجبنة كان طعمها غريب، لدرجة إنها كانت صفراء وطعمها زي صفار البيض. ندهنا على الويتر علشان نتأكد منه، هل مضاف بيض للطاسة ولا لأ، وطبعًا أكد إنه لأ.

للتواصل مع طاسة شوفوا صفحتهم على الفيسبوك.