The Definitive Guide to Living in the Capital , Cairo , Egypt

لو ماجربتش تتسحر على عربية فول فصدقنا كده فايتك كتير قوي! القاهرة فيها عربيات فول مميزة جدًا والسحور عليها بيخلي لرمضان طعم مختلف، في السطور الجاية هناخدكم في جولة لأجمد عربيات فول في العاصمة.. جاهزين؟!

 

ومبي.. عربية فول مميزة في إمبابة

إمبابة بتتميز بوجود مطاعم شعبية مميزة جدًا، لكن بالنسبة لنا عربية ومبي هي التجربة الأهم اللي لازم كل عشاق الأكل يخوضوها، ومبي بتقدم لك أطباق الفول بالزيت الحار أو الطحينة، مع سلطات طحينة وبطاطس، وحتى العيش في ومبي له طعم مختلف.

أسعار الأكل معقولة جدًا يعني تقدر تتسحر سحور من اللي قلبك يحبه ومش هتدفع 10 جنيه بس! وده بيخليها من أرخص أماكن الأكل في القاهرة. لكن الحقيقة مش ده السبب الوحيد اللي بيخلي العربية دي دايمًا زحمة، السبب الأهم هو أن أكلها مميز جدًا ونضيف ويمكن علشان كده هي بتسبب إدمان حقيقي للي بيجربها.

ببساطة هتروح إمبابة وتسأل على عربية فول ومبي وألف مين يدلك عليها.

 

مرزوقة.. أجمد عربية فول في المقطم

مرزوقة هي مشروع شبابي موجود في دخلة شارع متفرع من شارع 9 اللي هو أشهر وأكبر شوارع المقطم-قدام نادي مصر للتأمين بالضبط.. هتعرف الشارع من الزحمة الواضحة في دخلته، والعربيات الكتير اللي راكنة قريب منه.. هيلفت نظرك التصميم اللطيف للعربية، وشغل الإضاءات الملعوب اللي خلى منظر العربية شيك جدًا.

هيلفت نظرك كمان التيشيرتات اللي لابسها أفراد “الشلة” اللي شغالين في العربية، تيشيرتات بتصميم واحد جايبينها من نفس المكان علشان يبانوا بشكل كويس والناس تعرفهم من وسط الزحمة.

الأسعار في اللذيذ جدًا، خصوصًا لما تشوفوا الجودة المحترمة اللي معمول بيها الأكل، والنضافة الشديدة في تحضيره.

 

فول الجحش.. تجربة هايلة في السيدة زينب

فول الجحش واحد من أفضل الأماكن اللي بتعمل فول بلدي على أصوله في القاهرة، وموجود في شارع جانبي جنب جامع السيدة زينب. مجرد كشك صغير في ركن شارع، مش مطعم بقى وليه عنوان ورقم تليفون، أو أي حاجة من الحاجات ديه. عشان توصله خلي الجامع على يمينك وإمشي في شارع بورسعيد لغاية ما يتفرع منه شارع جانبي صغير ناحية اليمين، هـ تلاقي الجحش في ركن في أول شارع جانبي على شمالك.

المكان مخصص للفول والفول بس، مش لقعدة سمر ودردشة. وبيقدم 3 أنواع فول: بالزيت الحار والعادي، وبالزبدة. وهينزل لك مع الطلب أطباق البصل بالخل والمخلل والسلطة الخضرة والبتنجان المقلي والفلفل الأخضر والجرجير. ومعاهم عيش بلدي وطحينة وطبقين ملح وفلفل.