The Definitive Guide to Living in the Capital , Cairo , Egypt

رنا شرف

عشاق الشاورما كثير في القاهرة! الأكلة السهلة اللذيذة، اللي كلنا صغار وكبار بنحبها، ويا سلام لو معاها طحينة وعيش كايزر وتبقى كدا شاورما مصري أصلي، أو ثومية وعيش صاج وكدا هتبقى سوري.. طيب نجيب منين شاورمة مصري حلوة أو سوري مميزة من مطاعم القاهرة؟ تعالوا نعرف أحلي أماكن من وجهة نظرنا وجربناها بالفعل.

 

أحلى أماكن شاروما مصري

مطعم نص دستة الموجود في تشيل أوت الدفي من الأماكن اللي أثبتت نفسها بسرعة وبدأ يتوسع في الفروع ودي علامة تؤكد النجاح. نص دستة مكان بسيط بيعمل وجبات شاورما بالطحينة والعيش الكايزر وكمان حوواشي نص دستة، وموجودين حاليًا كمان في الرحاب ومصر الجديدة والعبور والأسعار بتبدأ عندهم من 42 جنيه للسندوتش.

أبو حيدر من الأماكن اللي ماينفعش نذكر الشاورمة المصرية ومنجيبش سيرتها، هو بجد ملك الشاورما المصري. أبو حيدرمعروف كمان بالمانجا التحفة، وعنده الشاورما مليانة طحينة مميزة وجنبها شوية طرشي الله على الجمال! أبو حيدر موجود في مصر الجديدة وهتلاقوا هناك طوابير مش عادية من عشاق أكله، وهو مميز في الأسعار، الساندوتش عنده بيبدأ من 30 جنيه.

وطبعًا مش هننسى سمسمة، الاسم الشهير في عالم الشاورما المصري. سمسمة من علامات الدقي المميزة لأن هناك فرعه الرئيسي، والأسعار هناك بتبدأ من 42 جنيه للسندوتش الكايزر العادي.

 

 

أحلى أماكن شاروما سوري

ابن الشام من المطاعم الجامدة في عالم الشاورما السوري، وله أسم كبير، ومشهور بالعيش الصاج الحلو والمحمرة الرهيبة كمان. ابن الشام الأسعار عنده بتبدأ من 80 جنيه لسندوتش الشاورما، ولازم تجربوا من عنده الشاورما الفراخ، وأهم فروعه موجود في التجمع. 

زين الشام كمان من المحلات المشهورة اللي بتقدم أفضل شاورما سوري في القاهرة، والأسعار عنده بتبدأ من 76 جنيه، وفرعه في الرحاب.

ومش هننسى برضه كرم الشام، اللي بيعتبر أشهر محل شاورما سوري في وسط البلد ومعروف بسندوتشاته الكبيرة وسعرها المعقول، والأسعار عنده بتبدأ من 70 جنيه.

 

سواء كنت بتحبها مصري أو سوري.. مهم تستمتع بالشاورما في القاهرة.. أكلة سعيدة!