The Definitive Guide to Living in the Capital , Cairo , Egypt

رنا شرف

كلنا بنحب الخروج والسهر، ويا سلام لو السهرة كانت مع وجبة عشاء مميزة، بتبقي خروجة جميلة ومبهجة، ونقدر نقول إنها في نفس جمال بوكيه الورد اللي كانت “يسرية” بطلة فيلم أحلى الأوقات نفسها تستقبله من إبراهيم!

إحنا النهارده جبنا لكم أماكن شايفين إنها تنفع لعشاء رومانسي، يمكن تستغربوا بعضها، لكن في النهاية إحنا مؤمنين إن التجديد مطلوب ومش لازم المكان الرومانسي يكون بيقدم موسيقى مع إضاءة خافتة وبس.

 

Atlantis Corner

من الأماكن المميزة من حيث الفيو، وده لأن المكان علي النيل، وده الحلو اللي فيه، يعني مكان بيجمع بين أكل مميز ومشروبات معمولة بمزاج وفيو حلو، ومستوي الأسعار هناك معقول مش غالي.

ديكور المكان جميل وبسيط، وهو برضه مناسب لعمل عيد ميلاد أو مناسبة جميلة.

أتلانتس كورنر موجود في 74 شارع عبد العزيز آل سعود، المنيل.

عيون بيروت

من المطاعم الجميلة في المعادي، وفيو المكان حلو، وده برضه لأنه على النيل مباشرة. المكان هيعجب كل عشاق الأكل اللبناني، خصوصًا المشاوي والأكلات اللبنانية التقليدية، وطبعًا السلاطات المميزة، زي التبولة والفتوش.

المكان بيقدم كمان مشروبات حلوة وعصائر فريش.

العنوان: كورنيش المعادي، أمام مستشفي السلام الدولي.      

 مراكش

مطعم مغربي، وده بيبان أكتر في ديكوراته وأكلاته المغربية الجامدة، يعني المكان هيحسسك إنك فعلًا في المغرب.

عجبنا في المكان التحف والأنتيكات المغربية، وفريق المطبخ كمان أغلبه من المغرب، يعني هتاكلوا أكل مغربي على أصوله بجد.

لو أنت من عشاق الأكل المغربي، أو حابب تدخل في تجربة أكل مختلفة، لازم تزور مراكش.

العنوان: التجمع الخامس، فندق هيلنان لاند مارك.

طرح البحر

من المطاعم اللي هتعجب محبي الأسماك، علشان المطعم ده بيقدم مأكولات بحرية جميلة وأسعاره معقولة، مع كمية أكل مناسبة بجودة عالية.

لكن لو ماكنتش من عشاق الأسماك يبقى أكيد مش هتلاقي نفسك هناك.

العنوان: 2 شارع عزت سلامة، متفرع من عباس العقاد، مدينة نصر.

كبابجي الرفاعي

أكيد هتستغرب وجود كبابجي الرفاعي في قائمة عن المطاعم الرومانسية، لكن الحقيقة إن المطعم رغم إن ديكوراته أبعد ما يكون عن الرومانسية، إلا أن أكلاته جامدة وبتنشر حالة من الحب والبهجة لازم تجربها مع حبيبك.

كبابجي الرفاعي بيعتبر مطعم تراثي، ده غير إنه في منطقة جميلة هتفكرك بأيام زمان وأفلام الأبيض والأسود، وده لأن المطعم من سنة 1960.

عنوان كبابجي الرفاعي: 29 حارة مونج، السيدة زينب.

أول قاعدة في الحب بتقول إن التجديد مهم! علشان كده لازم تنوع في الهدايا اللي بتجيبها لحبيبك، مرة بوكيه ورد، ومرة أكلة مبهجة في نفس جمال الورد!