The Definitive Guide to Living in the Capital , Cairo , Egypt

دايمًا بندور على أماكن مميزة علشان نغير جو وننبسط فيها سواء بالقعدة أو الخدمة أو الطعم، وعلشان كده النهاردة قررنا نجرب مطعم Aspero في ممشى أهل مصر الشهير، وخلينا نقول أن المكان معروف لدى اخواتنا العرب أكتر من المصريين.

واحنا لما بنقرر نجرب مكان جديد بيبقى كلنا أمل إن التجربة تكون على قد التوقعات خصوصًا لما يكون المطعم له صيت واسع زي Aspero في ممشى أهل مصر، لكن هل الإسم بيضمن الجودة؟! خلينا نعرف حقيقة التجربة خطوة بخطوة.”

المكان فيه ان دور مكيف والجو فيه لطيف وآوت دور على النافورة ويرى النيل ومناسب بالليل، والخدمة عندهم لطيفة رغم أن المكان زحمة والاصطاف بيجتهد في تبرير شغلهم وعندهم نقطة هنوضحها نهاية الريفيو، ولكن خلينا نعرفكم أن المكان لاست أوردر الساعة 11:30 مساءً، وبعدها بيكون فيه حفلات فيها فنانين وراقصات شرقي بسعر تكت مختلف عن الأكل والشرب، والمكان بيقدم مشروبات روحية وغير مناسب للأطفال بالليل.

بدأنا طلبنا بسلطة سيزر تشيكن وكان سعرها 380 جنيه، وهي كانت لطيفة  بس مش سلطة سيزر اللي عارفينها لأن فيه كام ملحوظة صغيريين، أولًا مكنش فيها طماطم كرزية، وكمان مفيش أي طعم للجبنة البارميزان والخس متقطع كبير جدًا، وهنا خلينا نقول مكنتش قيمة مقابل سعر.

كمان طلبنا طبق مقبلات Aspero كومبو وكان سعره 700 جنيه، وكان فيه سبرينغ رول وطعمه حلو لو بتحبوا البصل، وأصابع موتزاريلا منزلتش أصلًا وبطاطس بيتزا وصوابع دجاج مقرمش وحلقات البصل وطعمهم حلو وانبسطنا منهم، وكمان كان مع الطبق 4 صوصات باربيكيو ومستردة عسل ودول كانوا ممتازين، أما صوص القشدة الحامضة والجبنة الزرقاء خلينا نقول مش الألطف لينا.

الأطباق الرئيسية قررنا نخليها باستا علشان الوقت وكمان علشان نقدر نعرف مدى خدمتهم للأطباق العادية اللي مش غالية، وأول حاجة طلبنا ألفريدو بسعر 380 جنيه وكان طعم المكرونة والصوص حلوين والحقيقة مقدرناش نحدد طعم الفراخ لأنه مكنش واضح لنا وكانت الكمية قليلة، وكالعادة البارميزان مختفية.

وكمان طلبنا مكرونة نجرسكو بسعر 380 جنيه، وكانت الأفضل بين جميع الأطباق والطعم مميز ولكن المشروم والفراخ كانوا قليليين ولكن نقدر ننسى ده في ظل الطعم المميز واللي أكيد الريحان كان له دور فيه، وبعكس كل الأطباق كان فيه جبنه واضحة ولكن مش بارميزان.

أخيرًا قررنا نطلب الحلو علشان نشوف قوتهم في الحلويات، وبدأنا بـ”كيكة الشيكولاته” وسعرها 300 جنيه، وهي عبارة عن كيك مع الآيس كريم وصوص الشيكولاته ومكسرات عين الجمل وكرات الشيكولاته والكريم شانتيه، وهي طعمها مقبول بس مكنش فيها لا عين جمل ولا شيكولاته ولا كريم شانتيه.

كمان جربنا “فطيرة التفاح” بسعر 320 جنيه وخلينا نقول “حكايته حكاية” أجمل طبق في كل حاجة وهون علينا اليوم وهو كان عبارة عن فطيرة تفاح مع آيس كريم فانيليا وصوص الكراميل الحلو وكان عيبها الوحيد أنها مكنش عليها الآيس كريم، بس الحقيقة هي مش محتاجة.

أما بقى بالنسبة للخدمة وفريق العمل كانوا الصدمة الحقيقية، هو دايمًا مبتسم في وشكم بس علشان “يعلم عليكم” دي حقيقة، وخلينا نقولكم أن كل حاجة كانت ناقصة في الأطباق بلغنا بيها وكل مرة فيه “سبب” مختلف لعدم وجود الناقص ده بس كله متجه في أننا مش حاسين بالطعم أو مش شرط يكون فيه طماطم في سلطة الـ”سيزر” ومش مهم قلة المكونات لأن ده الريسبي بتاعنا المميز وهكذا، ولحد ما وصلنا في النهاية لما اتكلمنا على الآيس كريم وعين الجمل اللي مش موجودين الأول قالوا مش موجودين في المنيو، وطلبنا المنيو ولما الويتر لقاهم مكتوبين قال لنا نصًا “مش مشكلة هي بولة آيس كريم فانيليا نجيبهالكم، والكريم شانتيه هو مش بيتحط للأكل لكنه تذويق وبيبقى يادوب نقطة صغيرة علشان يدي شكل” وهنا قررنا نعترض وقمنا ودفعنا الحساب، وخلينا نختصر عليكم كل اللي فات بأن  مطعم Aspero مكان قعدته تحفة، خصوصًا بالليل، لكن تجربة الأكل والخدمة محتاجة مراجعة شاملة منهم والأسعار مرتفعة مقابل الجودة المتوسطة وتبريراتهم غير مقنعة لأي شخص مهما كان، احنا بصراحة مش هنفكر نزروهم تاني، بس هل أنتوا هتدوهم فرصة وتتغاضوا عن الجودة والخدمة مقابل القعدة الحلوة؟!

تقدروا تعرفوا أكتر عنهم من خلال صفحة الفيسبوك من هنا.