The Definitive Guide to Living in the Capital , Cairo , Egypt

أننا نلقى مكان في القاهرة بينقلكم لأجواء إيطالية متميزة ده من النوادر بالتأكيد، وعلى الرغم من أن فيه كتير من الأماكن اللي ممكن تكون مميزة في الديكور والأكلات الإيطالية إلا أن piccolo mondo تفوق على الجميع بداية من دخول المكان  والاستمتاع بأجواءه وديكوراته ومرورًا بالأكل المتميز عندهم، وخلال السطور اللي جاية هنعرفكم على تجرتنا في المطعم اللي بهرنا ونقولكم على تفاصيل تجربتنا اللي خوضناها بكل حب للمكان.

نبدأ بتفاصيل المكان وهو موجود في مركب على نيل الزمالك وفيه ترابيزات وكراسي كلاسيكية فخمة من الخشب والترابيزات مفروشة بمفارش إيطاليا الشهيرة ويطغى عليها اللون الأخضر المنقط بالأبيض واللون البني، وبيقدموا تجربة في الخدمة ممتازة، ولكن للأسف التاربيزات اللي على النيل للمجموعات أكثر من 3 أفراد فلو رايحين فردين أو شخص واحد مفيش مكان لكم على النيل مباشرة، والخدمة عندهم هادية وبسيطة زي الطابع الإيطالي.

بدأنا تجربتنا وطلبنا Cannelloni Ricotta بسعر 395 جنيه، وكان عبارة عن كانيلوني معمول من عجينة الكريب ومحشي بالسبانخ وجبنة الريكوتا وعليهم جبنة بارميزان والطعم كان في حتة تانية وده هيعرفوا محبين السبانخ بالتحديد لأنهم عاملين توليفة جميلة مخلية كل قطمة تحكي تفاصيل كل طعم في الطبق.

كمان طلبنا بيتزا سلامي وسعرها كان 395 جنيه، وهي عبارة عن عجينة بيتزا نابولي وعليها صلصة الطماطم الخاصة وجبن موتزاريلا وقطع السلامي، ورغم طعمها المميز إلا ان كان عندنا ملاحظتين الأولى أن مفيش فيها طعم الحطب اللي بيميز البيتزا الإيطالي، والتانية أن الموتزاريلا طعمها مكنش واضح ومحتاجين يظبطوا الحتة دي جدًا، ولكن كمجمل التجربة عجبتنا جدًا.

وبما أن المكان إيطالي قررنا نطلب من عندهم التيراميسو وهو طبق حلو من أشهر أطباق إيطاليا المتميزة وسعره 180 جنيه، وبيتكون من كريمة المسكربوني والبسكويت المغموس في القهوة الإيطالي مع رشة كاكاو، والطعم كان حكاية وخلصنا الطبق وكان نفسنا نطلب تاني ولكن شبعنا جدًا كنا، وده من أجمل أطباق التيراميسو اللي جربناها في مصر.

التجربة كانت لطيفة وبنشجعكم لزيارة المكان والاستمتاع بديكوراته المتميزة وطعم الأكل اللي هيبهركم بجودته.

المكان بيكون بالحجز من خلال الرقم المختصر بتاعهم 19982 وفيه حد أدنى للطلبات 500 جنيه للفرد.

تقدروا تعرفوا أكتر عنهم من خلال الموقع الالكتروني من هنا.