منيو أوك جريل الجديدة وروح الطبخ وحرب الفلافل: حوار مع الشيف جو بارزا
Hend Salah
مطعم كونراد القاهرة أوك جريل بالتعاون مع الشيف اللبناني المعروف جو برازا جددوا منيو المطعم، وأضافوا لها أكلات من دول عربية ودول من منطقة البحر المتوسط، وطبعًا وجود جو في المكان بيقول إننا في انتظار أطباق جبارة وأكلات مبتكرة.
قبل معاد إطلاق المنيو الجديدة قدرنا نعمل حوار مع جو برازا صاحب 24 سنة خبرة في مجال الطبخ وإدارة المطاعم، واللي شارك في تقديم نسخة الشرق الأوسط من برنامج توب شيف وغيره من البرامج المشهورة.
معروف عنك تمردك على طرق الطبخ التقليدية، عايزين نعرف إزاي بتبتكر نكهات جديدة؟
الطبخ فن، ولازم يخرج من قلبك. الأكل فعلًا هو عشقي، وأنا مش بعمل أكثر من شوية تعديلات على وصفات الأكل التقليدية. من المهم عندي كمان إن كل أكلة تأخذ حقها من التركيز والابتكار، وأحسن حاجة عندي إني بأنفذ كل حاجة بنفسي.
إحكيلنا عن بدايتك مع عالم الأكل!
البداية كانت مع الحرب الأهلية في لبنان وإني كنت لازم أخرج بأي شكل، ومن هنا كانت بدايتي مع الطبخ. دخلت المعهد الفني للاختصاصات الفندقية في لبنان، وبعد التخرج تدربت على الطبخ هناك، وبعدها سافرت جنوب أفريقيا 6 سنين وهناك قدرت أطور مهاراتي وحياتي المهنية بسرعة.
إيه أهم قرار/لحظة كان بداية لرحلة نجاحك في عالم الطبخ؟
أهم حاجة تعلمتها في جنوب أفريقيا هي التفكير والابتكار وإن الطبخ مش مجرد عمل روتيني، وبعدها فهمت إن الكلمتين دول أساس تكوين أي شيف ناجح. من هنا بدأت أفكر خارج الصندوق، وقدرت أوصل لحلمي.
تفتكر ممكن في يوم من الأيام المطبخ الشرق أوسطي يشتهر عالميًا زي الأكل الصيني مثلًا؟
أكل الشرق الأوسط له شهرة عالمية، لكن الفرق بين مطبخ والثاني هو المجهود المعمول لخروج الأكل بشكل وطعم مميز. المسئولية هنا علينا بصفتنا شيفات الشرق الأوسط إننا ننشر أكلنا عالميًا.
إيه أكثر حاجة جذبتك لكونراد؟
أنا وكونراد لنا تاريخ طويل. أنا اشتغلت في الشرق الأوسط مع هيلتون وكونراد وساهمت في تأسيس مطبخهم وكمان تقديم شكل الأكل هناك.
نحب نعرف الجديد عند أوك جريل؟
أطباق لبناني محصلتش! وأحب أوعد أي واحد بيحب الأكل إنه هيستمتع بمنيو أوك جريل الجديدة، خصوصًا إني معايا فريق عمل محترف من بلاد وثقافات طبخ مختلفة، وأهم حاجة إنهم بيعتبروا الأكل جزء من حياتهم.
تنصحنا نجرب أي طبق من المنيو الجديدة؟
صعب أرشح طبق واحد علشان أي منيو بأقدمها بيكون فيها تناسق وتوازن وكل صنف فيها له حلاوته الخاصة.
الطعمية في مصر ولبنان مختلفين تمامًا، وكل واحدة فيهم لها طابع مميز. أنا عن نفسي بعشق الأثنين.
طبعًا إجابة دبلوماسية ختم بها جو بارزا حواره مع كايرو360! ولمعلومات أكثر عن أوك جريل، شوف صفحة كونراد القاهرة على فيسبوك، أو اتصل على 02-2580-8000.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
