The Definitive Guide to Living in the Capital , Cairo , Egypt

من أكثر الحاجات الشائعة في الأكل أننا بناكل الأول بالعين المجردة، المفروض والمنطقي أننا بنستطعم الأكل ونشوف نكهته وقوامه وكل الحاجات الجميلة دي، مش كده؟ الإجابة للأسف غلط، إحنا بصفتنا بني آدمين كائنات بسيطة جدًا ماشية وراء حواسها، ودي حاجة بيعتمد عليها خبراء تزيين الأكل والمصورين علشان يجذبوا انتباهنا.

صحيح معظمنا بيفتكروا أن الأكلات اللذيذة اللي بنشوفها في الإعلانات اتعملت على أيد أحسن الشيفات، لكن اللي ما نعرفوش أن خبراء تزيين الأكل من سنين طويلة بيستخدموا خدع وابتكارات علشان يوصلوا للشكل اللي يقدر يبهر الناس.

يعني عندك مثلاً الألوان والسبراي وممكن شوية أنوار وإضاءة، والمرعب في الموضوع كمان أنهم ممكن يستخدموا مواد مالهاش علاقة بالأكل، وفعلاً مش هتصدق خبراء تزيين الأكل بيعملوا إيه علشان الأكل يطلع شكله طازج وشهي.

 

البرجر

عمرك سألت ليه شكل البرجر في الإعلانات بيكون منفوش ومُغرى؟ الحقيقة أن البرجر اللذيذ اللي بنشوفه في الصور مش مستوي أصلاً، خبراء تزيين الأكل علشان يحافظوا على البرجر من الانكماش بيسخنوا حواف قطعة البرجر النيئة للون البنّي بموقد لحام، وبيستخدموا مرقة أو صويا صوص لتلوين قطعة البرجر باللون البنّي، فيه كمان مفاجأة ثانية، البرجر بيتغطى كله بالزيت! كده عندنا برجر جاهز للتصوير، بس طبعًا مش صالح للأكل بتاتًا.

 

الأطباق السخنة

طبعًا كلنا شوفنا صورة طبق فيه أكلة لذيذة سخنة والبخار طالع بيرقص منها كأنها قطعة كيك، بس في الحقيقة الموضوع أصعب مما تتخيلوا، علشان تصوّروا بخار السخونية خارج من الأكل محتاج أكثر من مجرد تسخين الطبق كذا مرة؛ الفكرة أنهم بيحتاجوا أسفنج أو كرات قطن منقوعة في المياه ويسخنوها في الميكرويف كذا مرة علشان يعملوا شكل الدخان، حتى لو كان الأكل نفسه بارد خالص، فيه ناس ثانية بترش الأكل بمياه سخنة قبل التصوير على طول علشان يطلع شكله لسه خارج من النار.

 

مشروبات منعشة

متأسفين أننا دمرنا الصورة اللي في خيالكم، بس لو كنتم فاكرين أن المشروب "المنعش" شكله زي الإعلانات، راجع نفسك من فضلك، الفقاعات اللطيفة دي معظم الوقت بتختفي قبل ما يعرفوا يصوروا أصلًا، الفكرة هنا أن خبراء تزيين الأكل لما بيحاولوا يصوروا المشروب بطريقة مبهرة بيضيفوا أسبرين أو دواء مضاد للحموضة علشان تطلع الصورة مبهرة والمشروب عليه الفقاعات المغرية دي، والكلام ده بيفضل موجود طوال وقت التصوير، فيه ناس كمان بتستخدم الصابون علشان يطلّع فوم كثير.

 

علامات الشوى

ممكن تحكيلي عن إحساسك لما تعرف أن علامات الشوى المميزة على اللحوم مش أكثر من مجرد طلاء وأسياخ معدنية علشان يطلعوا شكل واضح للشوى! فيه خدع ثانية تشمل استخدام مكواة وشوية ورنيش أحذية علشان يعملوا شكل عصاري لذيذ، إحنا طلعنا طوال الوقت مضحوك علينا!

 

الآيس كريم

صحيح الموضوع هيعمل صدمة لناس كثير، بس بولات الآيس كريم المغرية اللي بنشوفها في الإعلانات والتليفزيون مش أكثر من فروستينج أو دهون وسكر بودرة مخلوطين مع ألوان صناعية، ودي خدعة تضمن أن الآيس كريم يحافظ على قوامه وشكله ويفضل متماسك طوال فترة التصوير.

 

الديك الرومي

 

صعب تطلّع ديك رومي في الصورة شكله لذيذ ومغري، بس خبير تزيين أكل محترف يقدر يعملها، المصورين لما بيصوروا الرومي بيستخدموا ألوان الأكل وصوص بنّي وموقد لحام علشان يطلعوا الشكل الذهبي اللذيذ اللي بنشوفه، وحشو الرومي بيكون بطاطس مهروسة علشان يطلع شكله مالي مركزه في الصورة.

 

البان كيك

 

عمرك فكرت تاخذ صورة حلوة لبان كيك لسه طازجة وتنزلها على إنستجرام بس النتيجة كانت فشل ذريع؟ طبعًا حاجة متوقعة، علشان البان كيك في الحقيقة عمرها ما تقدر تحتفظ بشكلها فترة طويلة، خصوصًا أنك غرقتها بالعسل أو صوص Maple Syrup، في الحالات دي، خبراء تزيين الأكل بيستخدموا فواصل كرتون بين طبقات البان كيك علشان يحافظوا على قوامها.

 

اللبن

 

أنك تشوف صورة لكوكيز طايرة على كوب لبن أكيد بيغير من قبولك لفكرة شرب اللبن، حتى لو كان معمول من الصمغ الأبيض، أكيد فيه سبب أنهم مش بيستخدموا اللبن في الصور، أصل اللبن شكله مش لذيذ، خصوصًا لما تضيف عليه شوفان أو حبوب، وعلشان كده المصورين بيستبدلوه بحاجة قوامها متماسك زي الصمغ الأبيض وممكن كمان يستخدموا الشامبو.

 

مكعبات الثلج

 

لما يكون الهدف هو تصوير مشروب بارد، الخبراء بيحبوا يشتغلوا بالأكريلك أو مكعبات الثلج الزجاجية علشان يطلعوا صورة طبيعية ومشرقة، وطبعًا مكعبات الثلج الحقيقية ما تنفعش علشان بتسيح.

 

العيش

من شكل العيش نقدر نحكم هل هو طازة ولا لأ، بس اللي ما تقدرش تعرفه أن سلة العيش الجميلة الطازة هي عيش مرشوش عليه سبراي شعر أو عربيات، ودي خدعة بيستخدموها علشان يحافظوا على شكل العيش، مفاجأة مش كده؟ أمال لو عرفتم أنهم بيلزقوا السمسم بالملقاط هـ تعملوا إيه؟