The Definitive Guide to Living in the Capital , Cairo , Egypt

رنا شرف

الأكل التركي دايمًا ليه سحر خاص، وده مش غريب على المصريين اللي بيحبوا النكهات الغنية والتوابل القوية. المطبخ التركي والمصري بينهم تشابه كبير في أكلات زي المحاشي، البامية، أو الفريك باللحمة. ومع زيادة المطاعم التركية في القاهرة، بقى عندنا فرص كتير نجرب الطعم العثماني الأصيل من غير ما نسافر إسطنبول! في المقال ده، جمعنالك أحسن وأشهر المطاعم التركية في القاهرة لسنة 2025.. أماكن بتقدم تجربة متكاملة من الطعم، والعرض، والجو التركي الأصيل.

الشيف بوراك: عرض وطعم

مطعم “الشيف بوراك” اكتسب شهرة ضخمة في وقت قياسي. الأكل هناك مش بس لذيذ، لكنه تجربة كاملة من العرض اللي بيقدمه الشيف وفريقه. ديكور المطعم فخم جدًا، والإحساس العام يخليك كأنك في قصر عثماني. الأسعار تعتبر مرتفعة شوية، لكنها تجربة تستاهل فعلًا.

المكان: فندق تريومف ليكشري – القطامية

صفحة فيسبوك

نيشانتاشي: أكل تركي بسعر معقول

لو نفسك في تجربة تركية رايقة وبأسعار على قد الإيد، “نيشانتاشي” هو الاختيار الصح. المطعم في سيتي ستارز وبيقدّم أكلات تركية تقليدية بطعم أصيل وجودة ممتازة، من غير استعراضات أو شو مبالغ فيه.

المكان: مول سيتي ستارز

الموقع الرسمي

سراي: شو وطعم مميز في الشيخ زايد

“سراي” من المطاعم اللي بتوازن بين الأكل التركي الأصيل والعروض اللي بيحبها الزوار. المكان مشهور بالصواني الكبيرة والأوبن بوفيه، وأسعاره مناسبة جدًا للعائلات اللي عايزة تجربة مختلفة.

المكان: الشيخ زايد

صفحة إنستجرام

هانم أغا: الطعم الحلو بسعر على قد الإيد

مطعم “هانم أغا” من الأماكن الجديدة اللي قدرت تسيب بصمة بسرعة. بيقدّم أكل تركي لذيذ بأسعار معقولة جدًا مقارنة بالمطاعم التانية، وديكوراته بسيطة ومريحة. لو ساكن قريب من المعادي، لازم تجربه.

المكان: المعادي

صفحة إنستجرام

سلطان سراي: رحلة في الزمن العثماني

“سلطان سراي” تجربة مختلفة فعلًا! من أول ملابس الموظفين المستوحاة من التراث التركي، لحد العروض المبهرة باستخدام النيتروجين للأطباق. الأجواء هناك بتحسسك إنك فعلاً في قصر من قصور السلطان سليمان.

المكان: مدينتي

صفحة فيسبوك

وأخيرًا..

وفي النهاية، القاهرة بقت فعلاً وجهة لعشّاق المطبخ التركي، بتنوع مطاعمها وأسعارها اللي تناسب كل الميزانيات.

جربت أي مطعم من دول قبل كده؟ شاركنا تجربتك وقلنا مين أكتر واحد فيهم خلاك تحس إنك في قلب إسطنبول!