The Definitive Guide to Living in the Capital , Cairo , Egypt

الأكل من أهم مسببات السعادة ودايمًا بنحتاج نجرب أكلات كتير بعيد عن الأكل المصري اللي بنفتخر بيه، وعلشان كده بنحب كل فترة نجرب أكلات من مطابخ مختلفة، والمرة دي قررنا نجرب مطعم Nilerra الخليجي واللي بيقدم تجربة جديدة له في مصر وعلى ضفاف النيل الساحر، وخلال السطور اللي جاية هنقولكم على كل اللي محتاجين تعرفوه عن المطعم وتقييم الأكل بتاعهم.

المكان موجود على النيل في مول نلوس اللي بالمناسبة هو جديد وهنتكلم عنه في مقال خاص، والمكان فيه أوبن ايريا على النيل مباشرة وكمان فيه قعدة داخلية مكيفة، والكراسي والترابيزات كلاسيكية وراقية، مع إضاءة وورم هتديكم إحساس بالهدوء والراحة النفسية، وكمان عندهم كل فترة باند بيأدوا أجمل الأغاني العربية، وخدمة فريق عمل مطعم Nilerra مقبولة ولكن كنا نتمنى يكونوا أكثر احترافية وسرعة.

والمكان متنوع المطابخ وهتلقوا فيه أكتر من اختيار سواء مصري أو خليجي أو شامي أو ايطالي، يعني مناسب لكل الناس، واحنا جربنا من عندهم في البداية “فتوش لبناني” وكان سعره 125 جنيه، وهو كان ممتاز وطعمه عجبنا لحد ما دقنا “الطماطم” اللي للأسف كان فيها أفتر تست بسبب الحرارة وعدم حفظها كويس، وكمان جربنا “بف حجازي جبنة” بسعر 125 جنيه وهما كانوا 4 قطع هنعتبر انهم سمبوسك محشيين جبنه بيضاء بس بطعم مميز، ونازل سخن والطعم والجودة كانوا مقبولين.

وبعد المقبلات دخلنا على الأطباق الرئيسية وطلبنا “نفر مندي لحم” بسعر 475 جنيه، وخلينا نقول ايه الحلاوة والطعام دي، لأن الطعم كان مميز واللحمة نضيفة جدًا، والأرز مستوي صح، وكمان طلبنا “نفر فراخ” بسعر 390 جنيه، ونفس الحكاية في النظافة والطعم والجودة وبنرشح الطبقين دول بقوة.

المكان لطيف ومريح في قعدته وبالتأكيد بنرشحه كواحد من الأماكن المميزة بالأكل الخليجي على النيل، والمكان مش محتاج حجز وتقدروا تروحوا أي وقت واستمتعوا بالقعدة على النيل وأنتوا بتاكلوا أو تشربوا، وبالمناسبة هما شعارهم “عشق الخليج”، ومتنسوش لو زرتوه تعرفونا ايه أفضل طبق عجبكم.

تقدروا تعرفوا أكتر عنهم من خلال صفحة الفيسبوك من هنا.