The Definitive Guide to Living in the Capital , Cairo , Egypt

المتحف المصري الكبير اللي متوقع افتتاحه مع نهاية عام 2020، استقبل 331 قطعة أثرية أهمها 42 قطعة خاصة بالملك توت عنخ آمون، واللي كانت معروضة في متحف التحرير، وضمت مجموعة من الصنادل المصنوعة من الحلفا والنسيج ونبات البردي وصومعة من الخشب كان الفراعنة بيحفظوا فيها الغلال والحبوب، مع مجموعة من أواني الأكل وجعبة سهام، كان يستخدمها الملك توت عنخ آمون في رحلات الصيد.

كمان المتحف استقبل تمثال للإله سرابيس، الإله الرسمي للإسكندرية القديمة اللي انتشرت عبادته في العصر اليوناني الروماني.

وكمان وصل للمتحف المصري الكبير 27 قطعة من أخشاب مركب الملك خوفو الثانية، وهي قطع كبيرة الحجم، تم نقلها ضمن مشروع مشترك مع اليابان لاستخراج وترميم مركب خوفو الثانية، وبكده يكون إجمالي قطع المركب اللي اتنقلت للمتحف 892 قطعة حتى الآن وحاليًا بتخضع للترميم والتجهيز للعرض داخل المتحف الأكبر على مستوى العالم واللي هيضم الحضارة المصرية القديمة كاملة.

وطبقًا لتصريحات صحفية  لوزارة الآثار فعدد القطع الأثرية اللي اتنقلت من مختلف الأماكن الأثرية المصرية للمتحف المصري الكبير تخطى 49 ألف قطعة أثرية.