The Definitive Guide to Living in the Capital , Cairo , Egypt

مصر متحف مفتوح بكل تفاصيله وفي كل ركن تفصيلة تاريخية مميزة، وده في كل حتة على أرضها، ولكن النهاردة هنركز على شوارع القاهرة الفاطمية، اللي مليانة آثار إسلامية وكل مبنى فيها بيحكي قصة وحكاية مميزة، وفيه تفاصيل بتوضح الجمال المعماري لكل عصري في مصر، وهنسلط الضوء على أهم 3 شوارع في القاهرة تقدروا تستمتعوا فيهم بالآثار الإسلامية في القاهرة كمتحف مفتوح مجاني.

باب الوزير

نقدر نقول أنه من أهم الشوارع المصنفة كمتحف مفتوح للآثار الإسلامية، وهتلقوا فيه عمارة إسلامية كتيرة من مختلف العصور، ويختص بالعصرين المملوكي والعثماني، واتسمى “باب الوزير” ارتباطًا بالباب اللي بناه صلاح الدين الأيوبي في سور القاهرة الشرقي بين الباب المحروق وقلعة الجبل، وهو منسوب للوزير نجم الدين محمود، وفيه 3 أماكن مهمة “التبانة – سكة المحجر – باب الوزير”، وهتستمتعوا بكل تفصيلة معمارية في الشارع.

شارع المعز

أشهر شارع على الإطلاق الناس تعرفه، وده لأنه موجود في حي الحسين، ولأنه فيه أهم مباني بتبرز العمارة الإسلامية، ده غير أنه شارع تجاري ترفيهي، ودايمًا مليان رحلات فردية وجماعية لزيارة الشارع، وفيه ناس عندها طقوس أن تروحوا مرة اسبوعيًا للاستمتاع به، سواء لزيارة المدارس والمساجد والمباني الثقافية والأسبلة، أو علشان تقعد في الشارع تستمتع بيه وتتصور وكمان فيه اللي بيروحوا علشان يسهروا ويقعدوا على الكافيهات والمطاعم المتاحة فيه.

الدرب الأصفر

حارة الدرب الأصفر من الأماكن اللي تعتبر منسية بالنسبة للناس، رغم انها تعتبر من أهم شوارع المدينة اللي بترصد العمارة الإسلامية وانفراد تصاميمها، وهي ممتدة من منطقة الموسكي حتى الجمالية، وفيها عشرات البيوت الأثرية والتاريخية الإسلامية، وأشهرهم “بيت السحيمي – بيت مصطفى جعفر”، ده غير السُبل والزوايا والكاتيب”، وكمان فيها مساكن القاهرة التاريخية القديمة، ومعظم بيوت الدرب الأصفر ما زالت محتفظة بالمشربيات الخشب.