أفريكا سفاري بارك.. رحلة عائلية ممتعة وسط الحيوانات
أفريكا سفاري بارك أفريكانو بارك تفاصيل أفريكا سفاري بارك رحلة عائلية سفاري عنوان وأسعار أفريكا سفاري بارك
Mohamed Talaat
الرحلات العائلية كلها متعة وخاصة لما تكون في مكان مفتوح بيقربنا أكثر من الطبيعة، ومؤخرًا فريق كايرو 360 خاض رحلة ممتعة وخاصة لو معاكم أطفال، ورحلتنا كانت لأفريكا سفاري بارك في الكيلو 175 القاهرة إسكندرية الصحراوي، وهي قريبة من مدخل الـ1000 فدان. تعالوا نبدأ رحلة عائلية ممتعة وسط الحيوانات والطبيعة.
البداية كانت من بوابة أفريكا سفاري بارك، هناك عرفنا أن سعر التذكرة 1200 جنيه للسيارة الملاكي، وبعدها بتبدأ المغامرة! أول حاجة شوفناها كانت اللاما اللي أكلناها ولعبنا معاها وبعدها لقينا نفسنا وسط البجع اللي أكلناه سمك عن طريق خطاف، وبعدها اتنقلنا لرؤية القرود الموجودة في وسط بحيرة صغيرة، وبعدها حيوان النو الأزرق والنعام اللي أكل مننا الجزر، وحيوان المها ولكنه كان بعيد قوي عننا، وفرحنا قوي وإحنا واقفين وسط الغزلان وبنأكلهم وكنا حاسين بمتعة رهيبة وحسينا أن “الغزالة رايقة” بجد، وبعدها هتقابلوا بندق وعائلته من فصيلة الجمال، وهييجوا لحد عندكم في السيارة علشان تأكلوهم.
وبعدها بننتقل لمرحلة تانية ودي علشان ندخلها بنعدي بالعربية على جرف مائي وكأنه شلال وكان منظره رهيب ومقلق في نفس الوقت “بيرفع الأدرينالين” لأنكم بتمشوا بالعربية فوق مجرى مائي، بعدها وصلنا لمكان الفلامنجو، وبعدا وصلنا للمكان اللي فيه النسر والنمر، واللي ممكن تتصوروا معاه من خلف الزجاج، وبعده بتروحوا لسيد قشطة علشان تأكلوه وتتصوروا معاه.
انبسطنا جدًا في منطقة القرود، وهنا لازم تتبعوا تعليمات الحراس علشان سلامتكم، وفيها بيترمي أكل على عربيتكم وأول ما تدخلوا القرود بتجري عليكم وتحتل العربية من كل حتة علشان تاكل، وهتلاقوا أحجام كتير من القرود وتقدروا تتصوروا معاها من ورا الزجاج، وبعدها عدينا على الضبع ثم اتنقلنا على طول لرؤية السلاحف الجميلة المميزة واللي هتحسوا أنها تعرفكم من زمان وبتجري عليكم علشان تاكل، وكمان رحنا اتفرجنا على الأسود الأفريقية.
ومن ضمن رحلة أفريكا سفاري بارك اتفرجنا واتصورنا مع بغبغان المكاو، وبعدها اتفرجنا من فوق على الدب البني والأبيض، وبعدها دخلنا منطقة قرود تانية ولكن المرة دي كانت أصغر وأقل عدد من المنطقة الأولى، ودخلنا من بعدها على الرحلة النيلية وفيها بتركنوا العربية وبتركبوا مركب وبتدخلوا بحيرة صناعية وسائق المركب بيديكم أكل وبتأكلوا الحيوانات، ولكن خلوا بالكم أن الجزر مش للقرود بس ولكن لكل الحيوانات، فماتخلصهوش على القرود زينا، وفي البحيرة شفنا بط وأوز وجديان وطائر الشرشار الصعيدي، وبعدها رحنا في اتجاه الشلالات واتصورنا هناك صور عائلية وفردية، ومن هناك رحنا شفنا الشامبنزي فتحي وسميرة، وكانوا لطاف جدًا وبيسمعوا الكلام علشان ترمي لهم أكل.
بعد الجولة النيلية توجهنا لبيت الطيور وشفنا الطاووس بألوانه الجميلة والأسماك في البحيرة الصغيرة، وأنواع كتير من العصافير بألوان جميلة واتصورنا صور ممتعة وسط الطيور وبعدها توجهنا لبيت الزواحف “الكهف” واللي هتشوفوا فيه زواحف من أماكن مختلفة، ولكن للأسف معرفناش نتصور مع أي كائن فيهم، وأكتر حاجة عجبتنا كان “الجربوع – سلحفاة مدغشقر – وطواط الفاكهة – خنزير غينيا”، وهنا كنا خلصنا خلاص ومش قادرين نكمل وقررنا نستكفي بكده من غير ما نشوف الأرانب ولا نتصور مع الثعابين واتحركنا علشان نكمل رحلتنا بره أفريكا سفاري بارك.
الرحلة كانت ممتعة بشكل عام، لكن كان عندنا شوية ملاحظات أولها أن الأكل مش بيتسلم على الباب مع التذكرة ولكنه بيكون متاح مع الحراس وللأسف لو مديتهوش إكرامية مش هيديكم الأكل بالكمية المناسبة للعائلة وكمان ممكن الحارس يكشر في وشكم لو طلبتوا منه أكل من غير دفع بقيش، زي ما عمل معانا حارس “سيد قشطة”، كمان حسينا أن الحالة الصحية لبعض الحيوانات محتاجة رعاية أكثر وياريت يهتموا بها وخاصة حالتها النفسية.
أما نصيحتنا فهي رتبوا الزيارة أنها تكون في أيام بعيد عن أي أعياد أو إجازات علشان الزحمة، وماتنسوش تكون ملابسكم قطنية ومريحة لأن الرحلة مرهقة، وطبعًا بنفكركم أنكم لازم تتبعوا تعليمات الحراس في التعامل مع الحيوانات بشكل يراعي سلامتهم وسلامتكم.
تقدروا تعرفوا أكتر عن أفريكا سفاري بارك من خلال صفحة الفيسبوك هنا.
