The Definitive Guide to Living in the Capital , Cairo , Egypt

مصدر الصورة الرئيسية

مصر تاريخ وحضارة، ومهما اتكلمنا عنها مش هنخلص الكلام، حضارة قديمة وحديثة، آثار قبطية واسلامية وفرعونية ورومانية، لكن النهاردة هنحكي لكم عن أقدم 5 شوارع في القاهرة وأسباب تسميتهم بيها علشان تعرفوا جزء صغير من تاريخ بلدنا.

 

المغربلين

الشارع دا له 700 سنة، وأول ما تدخلوه هتنفصلوا عن القاهرة وزحمتها ومبانيها المميزة والحديثة والقديمة، لأنكم هتنتقلوا بالزمن جواه، وهو تابع لحي الدرب الأحمر، واتسمى بالمغربلين علشان وجود أصحاب مهنة غربلة الحبوب فيه، وهو شارع أثري فيه مجموعة من الآثار القديمة زي زاوية عبد الرحمن كتخدا، ومسجد جاني بك وزاوية قرطبة الذهبي.

الأشرف

اتسمى نسبة إلى الملك أشرف صلاح الدين خليل بن قلاوون، ويطلق عليه حاليًا شارع “الأشراف” وطريق آل البيت، علشان فيه كتير من الأضرحة، وهو موجود في المنطقة ما بين فم الخليج والسيدة زينب، وحاليًا الحكومة المصرية بتسعى لتطويره علشان يكون مزار سياحي مهم نظرًا لكثرة التردد عليه من قبل الأجانب.

 

أمير الجيوش

يبدأ من ميدان باب الشعرية لحد ما يوصل لشارع المعز، واتسمى نسبة إلى القائد بدر الجمالي بعد دخوله مصر عام 1074 ونجح إنه ينقذ الدولة الفاطمية من المجاعة واستفحال الأتراك والبرابرة، وما زال الشارع بيحمل لمسات من ما كان عليه ومشهور أيضًا باسم “النحاسين” في الوقت الحالي.

الأزهر

الشارع بناه جوهر الصقلي، وزمان كان محاط بأسوار كبيرة علشان يكون حصن للخليفة المعز لدين الله الفاطمي، واتمنع الشعب وقتها من دخول الشارع إلا بإذن، ومن أشهر معالمه “جامع الأزهر” اللي اتبنى في يونيو 970 ميلادية وده السبب في اسم الشارع!

 

خان الخليلي

عمر الشارع تعدي الـ600 سنة، ولسه برونقه ومبانيه زي ما هي من عصر المماليك، واتسمى خان الخليلي نسبة للأمير جركس الخليل، اللي كان من ضمن التجار اللي هاجروا من مدينة الخليل الفلسطينية ليه، واشتغلوا بالتجارة وسمي على اسمهم، ومازالوا موجودين فيه ومن أشهر الأماكن فيه “قهوة الفيشاوي” اللي ليها أكتر من 200 سنة موجودة.