The Definitive Guide to Living in the Capital , Cairo , Egypt

بعد إعلان وزارة الآثار المصرية عن الاكتشاف الكبير اللي اتعرف باسم “خبيئة العساسيف” واللي ضم حوالي 30 تابوت خشبي ملون، عرضت الوزارة يوم السبت 19 أكتوبر الاكتشاف ده للعالم في المنطقة الخلفية لمعبد حتشبسوت، وأعلنت إنه هيتم نقل التوابيت للمتحف المصري الكبير في القاهرة خلال السنة الجاية، بعد عمليات ترميم بسيطة.

التوابيت حالتها جيدة جدًا زي ما أعلنت الوزارة لحظة الاكتشاف، وقالت إنها محتفظة بالرسومات والنقوش الهيروغليفية اللي عليها، وكمان كان واضح إنها تخص رجال ونساء وأطفال، وكانت مدفونة على عمق متر واحد من سطح الأرض في صفين فوق بعضهم، ويعتقد إن التوابيت دي تخص أسرة من كبار الكهنة.

و منطقة “العساسيف” اللي اكتشف فيها التوابيت هي جبانة فرعونية في البر الغربي للنيل في الأقصر، الاكتشاف ده يعتبر الأول في العساسيف بأيدين مصرية من أثريين ومرممين وعمال.