The Definitive Guide to Living in the Capital , Cairo , Egypt

مصر بتحارب الزمن علشان تقدر تنتهي من التجهيزات الأخيرة لافتتاح المتحف المصري الكبير في 2020، وبسبب اقتراب موعد افتتاح أكبر متحف في العالم واللي هيكون نقلة في تاريخ عرض الآثار المصرية حددت الحكومة المصرية رسميًا أسعار تذاكر الزيارة، وكمان أعلنت خطتها بخصوص مصير المتحف المصري بالتحرير.

خلال مؤتمر صحفي حديث أعلنت مصر رسميًا أن سعر تذكرة الزيارة للمتحف المصري الكبير هتكون 400 جنيه للأجانب و200 جنيه للطالب الأجنبي، و60 جنيه للمصريين، و30 جنيه للطالب المصري، وهيكون تشغيل وتقديم الخدمات مسنود لشركة عالمية متخصصة لتقديم أفضل جودة للزوار، لكن هيظل مدير المتحف والعاملين فيه كلهم من المصريين.

أما عن مصير متحف التحرير، أكدت الوزارة في نفس المؤتمر أنه هيستمر على حاله، ومافيش أي نية لإغلاقه، وهتفضل فيه أشهر مقتنياته زي لوحة المرمر وتماثيل زوسر وأخناتون وحتشبسوت وكل الآثار التانية زي ما هي، وكل اللي تم نقله للمتحف الكبير هو القطع الخاصة بالملك توت عنخ أمون، بإجمالي 5000 قطعة منهم 2000 قطعة هيتعرضوا لأول مرة.