The Definitive Guide to Living in the Capital , Cairo , Egypt

التسلية في رمضان بتاخد أشكال مختلفة، فيه ناس بتحب تتفرج على التليفزيون وناس تلعب كرة قدم وناس بتفضل القراءة، لكن على الجانب الآخر فيه عدد من عشاق الخروجات بيشوفوا في زيارة المتاحف والمناطق الأثرية فرصة حلوة لقضاء نهار رمضان.. تعالوا نعرف مواعيد زيارة متاحف القاهرة ومناطقها الأثرية في شهر رمضان 2022.

 

بمناسبة قرب حلول شهر رمضان المعظم، أقر المجلس الأعلى للآثار مواعيد جديدة لزيارة جميع المتاحف والمناطق الأثرية التابعة للمجلس في القاهرة وكافة محافظات الجمهورية خلال الشهر الكريم.

وبحسب تصريحات إعلامية للدكتور مصطفى وزيري الأمين العام للمجلس الأعلى للآثار، هتبدأ مواعيد الزيارة بالمتاحف والمواقع الأثرية من الساعة ٩ صباحًا ولحد الساعة ٤ العصر، ما عدا متحف الغردقة ومتحف شرم الشيخ، اللي هتكون مواعيد الزيارة زي ما هي على مدي فترتين؛ الفترة الصباحية من الساعة ١٠ صباحًا و حتى ١ ظهرًا، والفترة المسائية من الساعة ٨ مساءً وحتى ١١ مساءً.

كمان هتستمر مواعيد الزيارة في المناطق الأثرية بالأقصر وأسوان زي ماهي في الأيام العادية.

أما مواعيد الزيارة بمناطق الهرم وسقارة وقلعة صلاح الدين بالقاهرة فهتبدأ من الساعة ٨ صباحًا وحتى ٤ عصرًا.

وفي نفس السياق، أعلن المتحف القومي للحضارة المصرية بالفسطاط، إن مواعيد الزيارة في رمضان هتكون من الساعة ٩ صباحًا ولحد الساعة ٤ عصرًا.