The Definitive Guide to Living in the Capital , Cairo , Egypt

صحيح عندنا في مصر وفي آثارنا بدل الهرم اتنين وثلاثة، لكن عمرها جت في بالك إن يكون عندنا بدل أبو الهول واحد يبقوا اتنين أو تلاتة؟! ده تحديدًا الاكتشاف الأثري الجديد اللي أعلنت عنه البعثة السويدية المصرية واللي كان عبارة عن تمثال لـ “أبو الهول” طوله 16.4 قدم، وارتفاعه 11.5 قدم، وعرضه 5 أقدام.

البعثة اكتشفت التمثال الضخم ده على بعد خطوات من جبل السلسلة، في المحجر القديم، على النيل في أسوان، زي ما قال الموقع الأمريكي “فوكس نيوز”.

الباحثين في البعثة بيقولوا إن احتمال يكون النحت الأثرى ده في عهد الفرعون أمنحتب الثالث، جد الملك توت عنخ أمون، واللي حكم مصر فى القرن الـ14 قبل الميلاد، وإن أبو الهول الجديد اتنحت بطريقة تشبه لحد كبير الطريقة اللي اتنحت بيها تماثيل طريق الكباش الموجودة فى الكرنك.

في أثناء عمليات التنقيب عن أبو الهول الجديد، اكتشف فريق التنقيب قطعة أصغر من تمثال أبو الهول تالت خالص بس حجمه أصغر بكتير من الأتنين الكبار، وبيقولوا انه احتمال يكون حد كان بيتدرب على النحت فعمل النموذج المصغر ده، لكن على أي حال، البعثة أكدت إنه هيتم المحافظة على المنحوتات اللي لقوها سواء كبيرة أو صغيرة وهتجهز للنقل، لكن الاحتمال الأكبر إن تمثال أبو الهول الكبير يفضل فى جبل السلسلة، لإن انكسر منه أجزاء، فهيكون نقله صعب من الناحية الفنية.