The Definitive Guide to Living in the Capital , Cairo , Egypt

معالم وسياحة

“البحيرة المقدسة”.. حكاية مكان ساحر في الأقصر عمره أكثر من 3000 سنة (صور)

أثار مصر البحيرة المقدسة تاريخ مصر مدينة الأقصر معابد الكرنك
“البحيرة المقدسة”.. حكاية مكان ساحر في الأقصر عمره أكثر من 3000 سنة (صور)
بواسطة
Mohamed Talaat

الصور لـ: محمد ورداني

مصر بلد مميزة بتاريخها وأماكنها الساحرة اللي مش موجود زيها في أي مكان تاني في العالم، ومن الأماكن اللي كتير من المصريين مايعرفوش عنها معلومات كتير، “البحيرة المقدسة”، اللي بتحتضنها مدينة الأقصر العظيمة، والبحيرة دي موجودة في منطقة معابد الكرنك.

ومؤخرًا نشرت شبكة “سي إن إن” الأمريكية تقرير عن “البحيرة المقدسة”، اللي موجودة خارج البهو الرئيسي لمعبد الكرنك، واللي بتحيط بالمعبد من جهة الشرق، والجنوب، والغرب.

ونشرت الشبكة مع التقرير مجموعة صور مميزة للمصور المصري “محمد ورداني”، اللي وثق زوايا البحيرة المقدسة خلال جولته الأخيرة بمعابد الكرنك.

وقال “ورداني” للشبكة الأمريكية إن البحيرة المقدسة بتعتبر “وجهة عظيمة ما تقلش أهمية عن عظمة أهرامات الجيزة”.

وبحسب المصور المصري، تاريخ “البحيرة المقدسة” بيرجع لعهد الملك تحتمس الثالث، سادس فراعنة الأسرة الثامنة عشر خلال 1481 إلى 1425 قبل الميلاد.

وبيشرح ورداني أن البحيرة كانت بتستخدم في التطهير والاغتسال خلال مراسم الاحتفالات، وكان الملك والكاهن الأكبر بيغتسلوا في مياهها قبل دخول غرفة قدس الأقداس، اللي بتعد أهم غرفة بالمعبد.

أما عن سر تسميتها، يوضح ورداني أن الكهنة كانوا بيغتسلوا بمياه البحيرة المقدسة قبل بدء المراسم أو الاحتفالات الدينية.

وبيتمثل عنصر الإعجاز في البحيرة المقدسة في أن مياهها لا تجف نهائيًا، وأنها موجودة طول السنة من أكثر من 3000 سنة، كمان منسوب المياه فيها ثابت ما بيتغيرش.

وبيقول “الورداني” إنه “رغم عوامل الزمن بأكثر من 3000 سنة، وعوامل التبخر، إلا أن مياه البحيرة لم تجف ولم يظهر بها أي طحالب أو روائح”.

وبيوصف المصور المصري، الحائز على العديد من الجوائز، الوقوف أمام البحيرة المقدسة: “بيتملكني إحساس بالفخر واستشعر عبقرية المهندس المصري القديم  اللي صمم بحيرة طولها 80 متر وعرضها 40 متر، وبتحتفظ بمياهها رغم مرور كل الزمن ده”.

مقترح