The Definitive Guide to Living in the Capital , Cairo , Egypt

مصدر الصور

عظيمة مباني القاهرة القديمة! كلها حكايات وتفاصيل وأسرار. ومسجد المحمودية، الشهير بالجامع المعلق، والموجود بالقرب من قلعة صلاح الدين الأيوبي بحي الخليفة جنوب القاهرة، هو واحد من أجمل مساجد القاهرة المنسية، واللي من حسن حظنا إن الحكومة المصرية افتكرته أخيرًا وقررت ترجع له رونقه.

تعالوا نتعرف أكتر على مسجد المحمودية من خلال 7 معلومات.

1 – مسجد المحمودية موجود وسط مساجد تاريخية مهمة، زي: (السلطان حسن، الرفاعي، جوهرة اللالا، وقانيباي الرماح)، يعني نقدر نقول إن المنطقة فعلًا متحف مفتوح للعمارة الإسلامية، وبيقع مسجد المحمودية شرق مسجد السلطان حسن ومسجد الرفاعي، وبالتحديد أمام “باب العزب” اللي شهد مذبحة القلعة الشهيرة فى عهد محمد على باشا.

2 – بيخضع المسجد حاليًا لعملية ترميم زي غيره من مساجد المنطقة، ضمن مشروع إحياء القاهرة التاريخية، بهدف إعادة القاهرة لسابق عهدها كمدينة تاريخية أثرية.

3 – مؤسس مسجد المحمودية هو محمود باشا والي مصر من قبل الدولة العثمانية في سنة (975 هـ – 1567م).

4 – بيطلق الباحثين على المحمودية اسم الجامع المعلق، لأنك بتدخله عن طريق الصعود على سلم مكون من عدة درجات.

5 – المسجد مكون من مساحة بيتوسطها 4 أعمدة كبيرة من الجرانيت الأحمر بتحمل 4 عقود كبيرة يتوسطها “منور” يرتكز على كوابيل حجرية فوقها عوارض خشبية بتحمل سقف المسجد من جهاته الأربعة.

6 – خطة تطوير المسجد بتشمل تطوير واجهته، مع ترميم أجزائه الداخلية وتجديدها، وطلائه، بالإضافة للحفاظ على التصميم الأصلي للمسجد.

7 – فيه حديقة جميلة موجودة أمام المسجد، اسمها حديقة الرملية، والبعض بيطلق عليها اسم حديقة المحمودية، وهي حديقة تاريخية مهمة في المنطقة.