The Definitive Guide to Living in the Capital , Cairo , Egypt

هنفضل نعيد ونزيد ونقول يا جماعة مصر مش القاهرة وزحمتها وبس، اطلعوا بره القاهرة وانطلقوا وتواصلوا مع الطبيعة في بيئاتها المختلفة اللي -لحسن الحظ- متوفرة لنا جوه حدود بلدنا.. واللي شاف مش زي اللي ماشافش، وآهو اللي شاف جاي يحكيلكم شوية من اللي شافه جايز الموضوع يفرق في أنه يوجد جواكم رغبة حقيقية للانطلاق وزيارة الأماكن دي.

محطتنا المرة دي كانت من الصحراء البيضاء في غرب مصر، وبمناسبة الصحرا يعني، ناس كتير بتستغرب من فكرة أنه في ناس بتحب الصحرا وقعدتها، إيه المميز يعني في شوية رملة وفضا اللي يخليني أتتعتع من بيتي وأسافر علشان أعيش لي يومين هناك! طيب بص يا سيدي، زي ما قلنا وبنقول وهنقول دايمًا: اللي سمع مش زي اللي شاف، واللي شاف مش زي اللي عاش، لكن خلينا نقول لك على شوية حاجات كده عن الصحرا نعرفك من خلالهم أد إيه الموضوع مستاهل. أول حاجة: فكرة البراح.. أن عينك تبقى بتبص يمين وشمال ما تخبطش في حيطة ولا مبنى ولا سور ولا حاجز، يبقى الفضا لمد البصر، كمية راحة نفسية غير طبيعية! تاني حاجة: هدوء الصحرا اللي مش هتلاقيه في أي مكان تاني، جرب تسكت مش هتسمع غير الصمت التام، مافيش أي تشويش خارجي، ودي فرصة عظيمة علشان تسمع صوت نفسك من جوة وتتعرف عاللي عايزة تقوله لك! تالت حاجة: ليل الصحرا.. الليل الساكن الهادي اللي سماه صافية بعيدًا عن الملوثات البصرية والضوئية، وشايف كل أجرامها ومكوناتها بوضوح شديد، للدرجة اللي تخليك لو مددت كده على ضهرك ورفعت عينك ليها وسرحت بعينك فيها هتتوه وتعيش حالة نشوة مش هتبقى عايز تفارقها ولا تفوق منها! وغير كده كتير، لما تجرب هتفهم قصدنا، مش بيقول لك من ذاق عرف؟

من رحلتنا للصحرا البيضا اللي كنا فيها أفراد من مجموعة كبيرة طالعة بتنظيم مساحة العمل المشتركة "شفشاون" في الدقي مع الجمعية المصرية لعلوم الفلك. جمعنا لكم مجموعة صور متنوعة من الأماكن الكتير اللي عدينا عليها، وبعدسات أكتر من مصور من المصورين الرائعين اللي كانوا معانا في الرحلة.. يللا بينا نطوف بينها ونشوف.

صورة بانورامية لإحدى مناطق الصحراء البيضاء – تصوير: منة حسني

صورة صخرة الـ "مشروم" الشهيرة بالصحراء البيضاء – تصوير: علي حافظ (مصور شفشاون)

 

صورة من جبل الكريستال – تصوير: ندى عادل

صورة سحلية صحراوية من الصحراء البيضاء – تصوير: محمد الجعفري

 

صورة لحظات الغروب الأخيرة من الصحراء البيضاء – تصوير: ندى عادل

صورة بانورامية لسماء الصحراء البيضاء ليلًا – تصوير: علي حافظ (مصور شفشاون)

 

صورة للقمر من خلال عدسة تيليسكوب الرصد – تصوير: لميس عزت

 

صورة لإحدى تلال الصحراء السوداء – تصوير: محمد الجعفري

 

صورة للنباتات الصحراوية من الصحراء السوداء – تصوير: محمد الجعفري