The Definitive Guide to Living in the Capital , Cairo , Egypt

بدأت وزارة الآثار المصرية بشكل فعلي أعمال الترميم والتعقيم الخاصة بتابوت الملك “توت عنخ آمون” في مركز ترميم الآثار في المتحف المصري الكبير؛ وده استعدادًا لعرضه في افتتاح المتحف المتوقع إنه يكون في نهاية 2020  واللي تم إنجاز أكثر من 90% من الأعمال والإنشاءات الخاصة بيه.

سنة 1922 كانت أول مرة يتنقل التابوت الذهب الخاص بالملك “توت عنخ آمون” بره مقبرته من بعد اكتشافه فيها، أما عملية نقله لمركز ترميم الآثار في المتحف الكبير، فان هدفها إنقاذ التابوت الخشبي من التلف، وفي نفس الوقت يستغل حدث عظيم وتاريخي زي افتتاح المتحف الكبير لعرضه للجمهور، جنب أكثر من 5 آلاف قطعة أثرية تخص الملك “توت عنخ آمون” واللي من بينها كمان العجلات الحربية، زي ما قال وزير الآثار “خالد العناني”.

بالنسبة لأعمال ترميم التابوت فهتستمر لحوالي 8 شهور، وهي فعليًا بدأت بعد نقله في شهر يوليو اللي فات، وبدأت عملية الترميم بعزل التابوت 7 أيام قبل دخوله مرحلة التعقيم اللي هتستمر 3 أسابيع متواصلة، وهتيجي بعدها مرحلة الترميم الأخيرة.

التابوت فضل من يوم اكتشافه، يعني حوالي 97 سنة من غير ترميم، وده طبعًا أدى إلى إن حالته تبقى سيئة جدًا، وعرّض قاعدته للسقوط، وحصله شروخ في جنابه، وده طبعًا تطلب عناية فائقة في عملية التعقيم والترميم قبل عرضه مع التابوتين التانين للملك توت عنخ آمون في افتتاح المتحف الكبير.