The Definitive Guide to Living in the Capital , Cairo , Egypt

الصور: الصفحة الرسمية للمتحف

الحضارة المصرية القديمة بحر مالهوش آخر، وكل بقعة في أرض مصر فيها حاجة حلوة من ريحة أجدادنا، ومن ضمن الحاجات الحلوة في القاهرة وبالتحديد في منطقة سقارة “متحف إيمحتب” اللي اتبنى تخليدًا لذكرى “إيمحتب” وتكريمًا له بصفته أول مهندس عرفته البشرية، والمتحف بيضم جواه أكثر من 250 قطعة أثرية.

 

“إيمحتب” هو صاحب الثورة المعمارية المصرية القديمة، وهو صاحب فكرة المقبرة الهرمية، وكمان نفذ المجموعة الهرمية للملك زوسر، وكان أهم تخطيط في الهرم هو تصميمه لممرات أسفل الهرم بتتجه لحجرة الدفن لتضليل اللصوص بطول 3 كيلو متر، وكان أول شخص يستخدم الحجر على نطاق واسع في بناء مجموعة هرمية متكاملة علشان يكون مقبرة، بدل الدفن في باطن الأرض داخل مقابر الطوب الطيني، ونجح أنه يبني معبد الوادي.

كمان نجح “إيمحتب” في أنه يبني أول معبد بالحجر في التاريخ المصري، وهو كمان أول من استخدم الأعمدة في البناء، وقبل كده كانت المعابد بتتبني من البوص والخشب والطين وسعف النخيل، وكمان هو أول واحد عمل سقف معبد، وأول من نجح في بناء تمثال فوق الأرض، ووضعه في مقصورة، لأن قبلها كانت التماثيل اللي بيصنعها قدماء المصريين بتتحط تحت الأرض، ومن أهم اللي كان بيميز “إيمحتب” أنه كان عنده فكر معماري كبير وواضح، وهو أول من خطط تصميمات بتتنفذ على الأرض مش بالاعتماد على البناء التراكمي.

أما متحف “إيمحتب” فبيتكون من 6 قاعات، ومن أهم الآثار في المتحف قاعدة تمثال للملك زوسر ‏,‏ و4 لوحات جرافيك بتستعرض فن العمارة قبله وبعده، وكمان فيه قاعة البعثات، اللي فيها حفائر تم اكتشافها، وبتحتوي على 62 قطعة أثرية من المتحف المصري، وتابوت على هيئة مومياء مغطى برقائق الدهب، ومجموعة الطبيب “قار” و21 تمثال برونزي، و20 قطعة من موائد القرابين والأواني الفخارية، وكلها من الفخار ما عدا ثلاث من الألباستر‏، وكمان 5 قطع من الحجر الجيري، ده غير مجموعة “عبريا” اللي بتتكون من 20 قطعة أثرية.

كمان المتحف بيضم ‏76‏ قطعة أثرية منها ‏60‏ من الأواني المختلفة، ولوحة من الحجر الجيري لمنظر لصناعة الألباستر‏، و16‏ تمثال أغلبهم من الدولة القديمة، وتمثال واحد من الدولة الوسطي، وأشهر القطع الموجودة تمثال “بتاح شبسس” في هيئة القارئ، وتمثال آخر داخل ناووس لرجل وزوجته‏.‏

ولو زرتم متحف “إيمحتب” هتلاقوا  ‏8‏ عناصر معمارية وهي جدران من الفسيفساء‏ بطول ‏10‏ أمتار تم تجميعها من أكثر من مكان، وتمثال للملك زوسر فاقد الرأس من الحجر الجيري،‏ وتمثال صغير من البرونز لـ “إيمحتب” وبيظهره أصلع ولابس قلادة وماسك في إيده بردية، ده غير 9 فتارين بتحتوي على آثار مميزة منها  تابوت خشبي، وتمثال وقارب، ومجموعة من الأثاث الجنائزي، وقناع ملون، وتمثال صغير للملك “بيبي”، ونصوص الأهرام وبردية ومسلة،‏ ولوحة المجاعة.

والمتحف فيه مكتبة “لوير”، واللي بتضم 300 كتاب عبارة عن دوريات ومطبوعات بتتكلم عن الآثار، ده غير فاترينة فيها متعلقات عالم الآثار جان فيليب‏ (بوصلة ـ كاميرا ـ صور فوتوغرافية‏)، ولوحات جرافيك بتتكلم عن العالم الأثري فيليب لوير وأعماله في منطقة سقارة، ده غير قاعة كان تم تخصيصها للدفن، واتنحتت على شكل مقبرة بالكامل، وفيها تابوت خشبي وبواقي حفر من الفخار والألباستر والخشب، وكمان مومياء لـ “ميتب رع” ابن الملك زوسر، وبتتعرض في فاترينة خاصة للحفاظ عليها.

عنوان المتحف: منطقة آثار سقارة، يمين الهرم، البدرشين، الجيزة.
أسعار التذاكر: 10 جنيه للمصريين، و5 جنيه للطلاب المصريين، و120 جنيه للأجانب، و60 جنيه للطلاب الأجانب. 
مواعيد الزيارة: يوميًا من 9 صباحًا، حتى 5 مساءً.