The Definitive Guide to Living in the Capital , Cairo , Egypt

من الأماكن الحلوة في القاهرة متحف أم كلثوم اللي موجود في شارع الملك الصالح في الروضة، واللي هتعرف منه تفاصيل كتير عن حياة كوكب الشرق.. في السطور الجاية هنعرفكم أكتر على المتحف من خلال جولتنا اللي استمتعنا بيها هناك.

تعتبر المنطقة دي  في أخر جزيرة الروضة أو الركن الجنوبي الغربي منها، وهي معروفة باسم منطقة (المقياس) علشان فيها مقياس النيل المشهور، والمتحف جزء من قصر المانسترلي، اللي هو تحفة معمارية أصيلة مساحته 1000 م2 واللي بناه صاحبه (حسن فؤاد باشا المانسترلي) سنة 1851م وهو كان (كتخدا) مصر في عهد عباس حلمي الأول. (الفترة من 1850 – 1854م) وكان كمان محافظ للقاهرة سنة  1854 ووزير للداخلية سنة 1857 وتوفى ودُفن بالقاهرة سنة 1859.

 

أما متحف أم كلثوم واللي ملحق بمبنى تبع قصر المانسترلي في مساحة 250 متر. فاتشكلت أول لجنة للبحث واستلام مقتنيات الست أم كلثوم في تاريخ 8/5/1998، ومن التاريخ ده وهم شغالين على جمع مقتنيات السيدة أم كلثوم وآثارها العامة والخاصة.

ومن المقتنيات دي ما هو شخصي  زي (ملابس / اكسسوارات / حقائب / أحذية / أدوات خاصة) أو مقتنيات فنية (عود / نوت موسيقية / تسجيلات نادرة / أفلام … إلخ) أو وثائقي (خطابات بين الراحلة ورجالات عصرها من سياسيين وقادة وشخصيات عامة / صور نادرة / كتابات خطية / أوراق مذكرات… إلخ) غير مجموعة نادرة من الأوسمة والنياشين من الحكومات العربية، ووثائق أخرى للعديد من الشخصيات الفنية اللي أسهمت بشكل مؤثر ومهم في حياة الست أم كلثوم.

أما لو حبينا نوصف المتحف ففيه قاعة رئيسية وهي فيها (8) فاترينات، زي المقتنيات الشخصية والأوسمة والنياشين غير (5) جداريات للصور النادرة الخاصة بكوكب الشرق بطريقة «الكولاج»  وغير برضه نوت موسيقية وأشعار مكتوبة بخط عدد من الشعراء لأهم أغنيات السيدة أم كلثوم – و خطابات متبادلة بين الراحلة ورجالات عصرها من السياسيين والقادة والشخصيات العامة – أوراق ومذكرات خاصة.

كمان فيه قاعة السينما  واللي بيعرض فيها فيلم تسجيلى لأم كلثوم من إنتاج صندوق التنمية الثقافية وفيه مقتطفات من قصة حياتها غير أجزاء من أفلامها الستة وحفلاتها فى مصر والوطن العربى وبيختتم بجنازة أم كلثوم ومدة الفيلم ده 26 دقيقة. وهو مترجم باللغتين الإنجليزية والفرنسية.

برضه فيه قاعة المكتبة السمع بصرية ودي فيها 5 أجهزة كمبيوتر بيتم من خلالها استعراض لجميع أغانيها وصور حفلاتها ورحلاتها الخارجية والداخلية وأفلامها غير سجل كامل فيه كل ما كتبته الصحافة العربية عن أم كلثوم منذ عام 1924 ولحد سنة عام 2000م .

غير قاعة البانوراما واللي بيعرض فيها مجموعة من الصور للمراحل العمرية لأم كلثوم خلال حياتها وصور لأفلامها ومجموعة صور مع الفنانين والمطربين وصور مع رؤساء الدول العربية. ومدة البانوراما دي 10 دقائق.

 ده غير الفيلم التسجيلي الصامت عن أم كلثوم واللي بيعرض في شاشة سينمائية وبيستعرضوا فيه حفلاتها فى مصر والوطن العربى وهو بمثابة واجهة لكل زوار متحف أم كلثوم. ومدة الفيلم ده 15 دقيقة.

تقدروا تعرفوا معلومات أكتر عن المتحف من خلال الموقع الرسمى لمتحف أم كلثوم من هنا.