The Definitive Guide to Living in the Capital , Cairo , Egypt

وأنت في محطة مصر، هتلاقي مبنى عريق مكتوب عليه متحف السكة الحديد.. لو مافكرتش قبل كدة تدخل المكان ده.. إحنا هناخدك في السطور الجاية في زيارة سريعة للمتحف ده.. يلا نبدأ.

المتحف هيخليك تتعرف على تاريخ النقل فى مصر والعالم، من خلال نماذج فنية كتير بترصد تاريخ كافة وسائل النقل من أيام استخدام الحيوانات المختلفة في النقل مرورًا بوسائل النقل من بداية صناعتها وهى فى شكلها البدائى، ولحد النهارده.

المتحف بتعود بدايته لسنة 1932، واُفتتح رسميًا في يناير 1933، وبيحكي تاريخ كافة وسائل النقل على مر العصور، وفيه قسم كامل للسكة الحديد من بدايتها على أرض مصر.

بيعرض المتحف اللي بيتكون من دورين تاريخ السكة الحديد من أول إنشائها وبيحتوي على نماذج للقطارات البخارية وأدوات السكة الحديد وكافة الوثائق والمستندات الخاصة بالسكة الحديد ابتداء من عقد إنشاء أول خط سكة حديد بين القاهرة والإسكندرية، وده عقد موقع بين عباس باشا حاكم مصر وروبرت استيفنس ابن مخترع القاطرة البخارية عام 1851 مرورًا بكافة الوثائق الثانية المتعلقة بالسكة الحديد وتطويرها على مستوى مصر والعالم.

كمان بيضم المتحف ثاني أكبر قاطرة بخارية فى مصر والقطار الملكي وبيعرض نماذج للقطارات على مدار مراحل تطورها والإشارات من أول ما كانت يدوية، كمان بيحتوي على بانوراما لخط سكة حديد كامل، وبيسرد مراحل تطور طباعة التذكرة وكيفية طباعتها والأدوات المستخدمة فى طباعتها.

المتحف بيعرض برضه في جناح مستقل وسائل النقل الثانية زي الطائرات على مراحل تطورها إلى الحيوانات والمراكب الشراعية، وبيعرض المتحف نماذج صور للحيوانات اللي كانت بتستخدم قبل إنشاء السكة الحديد وبعدها، وكان كلها بيستخرج له رخصة.

المتحف مفتوح يومياً بالنهار لحد الساعة اتنين الضهر وفيه عدد من المرشدين اللي بيعرفوا الزائرين على طبيعة كل حاجة من مقتنيات المتحف. ومقره هو محطة مصر برمسيس.