بانوراما أكتوبر: متحف بيحكي قصة نصر 1973 بتجربة تفاعلية مبهرة (صور)
أماكن ترفيهية في القاهرة السياحة في مصر بانوراما أكتوبر بانوراما حرب أكتوبر حرب 1973 متاحف القاهرة متاحف عسكرية مصر متحف أكتوبر مشاهد تفاعلية نصر أكتوبر
Cairo 360
الصور: موقع وزارة الدفاع المصرية
بما إننا بنحتفل النهارده بذكرى نصر أكتوبر العظيم، وبما إن الإجازة الرسمية هتكون يوم الخميس القادم، حبينا نرشحلكم مكان مميز للزيارة في الويك إند، وهو “بانوراما أكتوبر”.
المتحف اتبنى سنة 1983 تخليدًا للانتصار، وافتتح رسميًا في 1989، وبعد عمليات تطوير وصيانة كبيرة رجع يستقبل الزوار من جديد في 2019، على مساحة ضخمة بتوصل لـ 31 ألف متر مربع.
بانوراما أكتوبر مش مجرد متحف، ده تجربة تفاعلية كاملة بتحكي ملحمة العبور من خلال قاعات عرض متنوعة، ومؤثرات صوت وضوء وهولوجرام، بجانب معروضات عسكرية أصلية.
في ساحة العرض المكشوف هتلاقي أسلحة ومعدات من حرب أكتوبر، وكمان أسلحة العدو اللي استولى عليها الجيش المصري وقتها. بالليل المكان بيتحول لعرض مبهر بالـ Projection Mapping على المجسم الدائري مع موسيقى وأضواء.
جولة المتحف بتبدأ من بهو الاستقبال اللي فيه مجسم ضخم للمكان، ولوحات جدارية بتحكي معارك الجيش المصري من أيام القدماء المصريين لحد 1973، وكمان أسلحة بتقنية الهولوجرام.
بعد كده هتدخل قاعة “الصمود والتحدي” اللي بتعرض فيلم 3D عن إعادة بناء الجيش بعد 1967 وحرب الاستنزاف.
أما قلب المكان فهو “القاعة البانورامية” اللي فيها مسرح دائري متحرك ولوحة زيتية عملاقة بتحاكي لحظة العبور، بمؤثرات صوت وضوء تخليك تحس إنك وسط المعركة.
في “قاعة العبور” هتشوف فيلم جرافيك بيجسد مراحل الحرب ومفاوضات السلام، على شاشة سينمائية عملاقة.
آخر محطة في الجولة هتكون “قاعة جيش وشعب”، اللي بتحكي قصص تلاحم المصريين في ثورتي 25 يناير و30 يونيو، وبتعرض أهم مشروعات التنمية اللي بتحصل النهارده.
معلومات مهمة قبل الزيارة
العنوان: متحف بانوراما حرب أكتوبر، شارع صلاح سالم، مدينة نصر، القاهرة، قريب من محطة مترو أرض المعارض وبجوار ستاد القاهرة الدولي.
التليفون: 0226882042 / 0224022317
مواعيد الزيارة: المتحف يستقبل الزوار على فترتين يومياً: من الساعة 9:00 صباحاً حتى 3:00 مساءً، ومن الساعة 5:00 مساءً حتى 9:00 مساءً.
إزاي توصل بسهولة؟
لو بتستخدم بالمترو: أنزل عند محطة أرض المعارض، ومن هناك يتقدر تركب ميكروباص للمتحف.
لو معاك عربية: خذ شارع صلاح سالم لحد ما توصل للتقاطع المقابل لاستاد القاهرة، أو اتبع لافتات “بانوراما أكتوبر / متاحف عسكرية” الموجودة على الطريق.
وأخيرًا..
بانوراما أكتوبر مكان مناسب لكل الأعمار، سواء كنت مهتم بالتاريخ أو عاوز تعيش تجربة مختلفة مليانة تفاعل وتشويق. والويك إند ده فرصة مثالية تزوره وتحتفل بالنصر مع العيلة أو الأصحاب.
مقترح
الحياة في كايرو
أماكن النصر في القاهرة: خطة لخروجة يوم كامل هتعيشك أجواء أكتوبر
6 أكتوبر أماكن تاريخية +8
فن وثقافة
