The Definitive Guide to Living in the Capital , Cairo , Egypt

تصوير الفنان: عبد الرحمن سماحة

مصر فيها عدد كبير من الشهداء، حبوا البلد دي بجد، وعلشانها ضحوا بأرواحهم، وبمناسبة احتفال مصر بيوم الشهيد، هنعرفكم في الموضوع ده على 7 معلومات مدهشة عن متحف الرئيس المصري الراحل محمد أنور السادات بمكتبة الإسكندرية.

 

1 – في حوار مع موقع اليوم السابع، كشف عمرو مصطفى، مدير متحف السادات بمكتبة الإسكندرية، إن أكتر حاجة بتميز متحف السادات، هي البدلة اللي كان لابسها الرئيس الراحل لحظة اغتياله، والبدلة لسة لحد النهارده عليها آثار الدماء.

2 – المتحف بيضم كمان وشاح القضاء اللي كان لابسه الرئيس السادات، بالإضافة لساعته الشخصية المحفور عليها من الخلف آية الكرسي بالإضافة إلى الكاب والحذاء الخاصين بيه.

 3 – المتحف فيه المقتنيات الشخصية والبدل العسكرية اللي كان بيلبسها الرئيس السادات، وإدارة المتحف حصلت على المقتنيات دي من خلال زوجته السيدة جيهان السادات.

 4 – المتحف بيضم برضه البدلة العسكرية اللي كان لابسها السادات وقت رفع العلم المصري في العريش بعد اتفاقية السلام، بالإضافة لقلادة خاصة تم إهداءها له من دير سانت كاترين.

 5 – بالإضافة لكل اللي فات، بيضم المتحف كمان مجموعة من الصور النادرة للرئيس السادات أثناء مراحل الإعداد لاتفاقية السلام والخاصة بجولات الرئيس إلى الدول الأجنبية، كمان فيه في المتحف صورة نادرة للرئيس السادات مع الرئيس الأمريكي الحالي جو بايدن، واللي التقطت لهم أثناء زيارة السادات لأمريكا ولقائه بمجلس الشيوخ الأمريكي واللي كان من أعضاءه وقتها جو بايدن.

 6 – كمان بيحتوي المتحف على ركن خاص بالمقتنيات الشخصية للرئيس السادات والخاصة بحلاقة الذقن وفرش الأسنان، وركن خاص بمكتب السادات الحقيقي، وكمان مكتبته اللي بتضم مجموعة من الكتب الخاصة بيه.

 7 – المتحف بيضم برضه الجلباب الخاص بالرئيس السادات وكذلك مجموعة من المجلات الأجنبية اللي اتكلمت عنه وبعض الهدايا والقلادات اللي حصل عليها من خارج مصر.

 

عنوان المتحف ومعلومات أكتر عنه:

متحف السادات ‏موجود في محافظة الإسكندرية، وبالتحديد في الجزء الجنوبي من مكتبة الإسكندرية، وهو متحف فريد من نوعه أقيم بمبادرة من مكتبة الإسكندرية وبمشاركة أسرة الرئيس السادات، ومساحة المتحف 250 متر مربع.