The Definitive Guide to Living in the Capital , Cairo , Egypt

معالم وسياحة

بعد اكتشافها اكتوبر اللي فات.. وصول توابيت العساسيف للمتحف المصري الكبير

آثار الأقصر البر الغربي العساسيف المتحف المصري الكبير تابوت توابيت
بعد اكتشافها اكتوبر اللي فات.. وصول توابيت العساسيف للمتحف المصري الكبير
بواسطة
Mohamed Talaat

بعد الإعلان عن اكتشافها في شهر أكتوبر اللي فات، أعلنت وزارة الآثار إنها هتنقل 30 تابوت تم اكتشافهم كلهم مرة واحدة في جبانة العساسيف الأثرية في البر الغربي في الأقصر للمتحف المصري الكبير، والنهارده استقبل المتحف المصري الكبير توابيت “العساسيف” وهيتم البدء فورًا في ترميمها علشان تكون جاهزة للعرض في المتحف وقت افتتاحه في 2020.

 

 

الوزارة اعتمدت في عملية النقل على عربيات مغلقة ومجهزة بوحدة تحكم في درجة الحرارة، ومخدات هوائية لحماية التوابيت النادرة، وهيتم تجهيز قاعة عرض خاصة للتوابيت علشان تبرز قيمتها الأثرية والتاريخية و الفنية، وتمت كمان أعمال التوثيق والتسجيل الفوتوغرافي وإعداد تقرير عن حالة كل تابوت.

 

 

أعمال الترميم اللي تمت في الأقصر فور اكتشاف التوابيت كانت أولية، ده غير أعمال التغليف والتبطين اللي تمت بأسلوب علمي  قبل ما تتنقل من الأقصر للقاهرة، ومع وصول التوابيت للمتحف المصري الكبير، هيتم استكمال أعمال الترميم والتغليف دي بعد فحصها والتأكد من عدم إصابتها بالحشرات، وبعدها هتتنقل التوابيت لمعمل ترميم الأخشاب وتجهيزها للعرض.

 

 

حالة التوابيت بشكل عام ممتازة، سواء من ناحية الحفظ أو الألوان أو النقوش المتكاملة، على الرغم من إن تم الكشف عنهم بنفس وضعهم من عصر القدماء المصريين، وكانوا مجمعين في مستويين فوق بعض، المستوي الأول كان فيه 18 تابوت، والمستوي الثاني 12 تابوت.

مقترح