The Definitive Guide to Living in the Capital , Cairo , Egypt

مافيش شك إن قصر البارون إمبان المطل على شارع صلاح سالم في مصر الجديدة يعتبر واحد من أروع المعالم الأثرية و التاريخية فى مصر، وأخيرًا وبعد جهود كبيرة اتبذلت لإنقاذه من الإهمال والضياع، أعلنت وزارة الآثار المصرية على صفحتها على الفيسبوك إن أعمال الترميم الخاصة بالقصر انتهت بشكل كامل، علشان يرجع القصر تاني لرونقه وشكله الأصلي، في انتظار الإعلان عن موعد افتتاحه لاستقبال الجمهور قريبًا.

الخطة الجديدة اللي حطتها وزارة الآثار للقصر مش بس إنه يبقى مزار أو مكان أثري، وإنما هيبقى معرض بيحكي تاريخ حي هيليوبوليس أو مصر الجديدة، ويمكن علشان كده ضمت ساحة القصر الخارجية أقدم عربية “ترام” كانت بتخدم في هليوبوليس، ده غير مجموعة من التماثيل والأحجار القديمة.

نمط بناء القصر مستوحى من العمارة الهندية، وكان خاص بالمليونير البلجيكي البارون “إدوارد إمبان” وصممه المعماري الفرنسي “ألكساندر مارسيل  – Alexandre Marcel” بحيث ماتغبش عنه الشمس نهائي، وتدخل في كل غرفه وطرقه، وقام بزخرفة القصر المهندس “جورج لويس كلود – Georges Louis Claude” وخلص بناه سنة 1911.

فكرة القصر جت للبارون “إمبان” بعد ما عرض على الحكومة المصرية وقتها فكرة إنشاء حي في الصحراء شرق القاهرة، واختار له اسم “هليوبوليس” يعني “مدينة الشمس” واشترى البارون الفدان ساعتها بجنيه واحد، وده لإن المنطقة في الوقت ماكانش فيها مرافق ولا مواصلات ولا خدمات، ومن هنا جت الفكرة التانية للبارون وهي عمل “مترو”، واللي فضل شغال لحد فترة قريبة، وكان اسمه “مترو مصر الجديدة”.