The Definitive Guide to Living in the Capital , Cairo , Egypt

مصر مليانة متاحف عظيمة، بتسحر أي حد يزورها، ومن المتاحف المهمة خارج القاهرة، متحف الجزيرة بأسوان، واللي تم إغلاقه لحوالي 10 سنين، لكن الخبر العظيم هو إن وزارة السياحة والآثار بدأت في إعداد الدراسات اللازمة لمشروع ترميم وتطوير وإعادة تأهيل المتحف.

وبحسب تصريحات لهشام سمير، مساعد وزير السياحة للشؤون الهندسية، مشروع التطوير مش هيقتصر على ترميم المبنى بس، لكنه هيشمل كمان تطوير سيناريو العرض المتحفي والموقع العام والحديقة المحيطة بالمتحف، بالإضافة لتطوير منظومة الخدمات.

وقال الدكتور علي عمر، رئيس لجنة سيناريو العرض المتحفي، إن اللجنة تفقدت المتحف علشان تحدد حالته الحالية، ووبيتم حاليًا اختيار القطع اللي هيتم عرضها، وتم الاتفاق على مجموعة كبيرة منها بشكل مبدئي، والقطع اللي هيتم عرضها هتضم أهم الاكتشافات الأثرية بأسوان وتاريخ جزيرة الفنتين، وعرض تاريخ إقليم أسوان فى العصور المصرية القديمة.

ومشروع التطوير بيشمل كمان تطوير منظومة الإضاءة داخل المتحف والمنطقة المحيطة، إلى جانب تزويده بمنظومة تأمين شاملة.

مشروع التطوير هيشمل كمان المبنى الرئيسي للمتحف ومنطقة خدمات الزائرين واستغلال حديقة المتحف والمسطحات الخضراء الموجودة وسط الصخور علشان تكون مكان ترفيهي للزوار.

ومن المقرر يتم نقل مجموعة من القطع من المخازن الأثرية والمتحفية من أسوان وكوم أمبو والمتحف المصري بالتحرير لعرضها بالمتحف قبل افتتاحه.

معلومات عن متحف الجزيرة بأسوان

متحف الجزيرة بأسوان أُنشئ عام 1898 في الجزء الشرقي من جزيرة الفنتين، وصُمم في البداية علشان يكون استراحة للمهندس الإنجليزي السير ويليام ويكلوكس، مصمم خزان أسوان، وبعد الانتهاء من المشروع ده عام ١٩١٢ تم تحويل المبنى لمتحف وافتتاحه رسميًا عام ١٩١٧، وبيعد واحد من أهم وأقدم المتاحف الإقليمية.