The Definitive Guide to Living in the Capital , Cairo , Egypt

كل واحد فينا بيعبر عن حبه لبلده بطريقته وعلى حسب إمكانياته ومهاراته، ومهما كنا مختلفين في طريقة التعبير دي، إلا إننا بنتفق كلنا في حاجة واحدة، إننا “بنحبها”.

فارس حرز.. مصور مصري زيه زي كتير من الشباب المصري اللي بيحب وغاوي تصوير، بيقول في حواره مع كايرو 360 إن بدايات شغفه بالهواية دي كانت في 2010، ووقتها بدأ يصور مناظر طبيعية وبحر وشجر وحاجات عادية، ولمدة سنتين كان شغال بكاميرا “كوداك” عادية جدًا، وفي 2012 بدأ “حرز” ياخد الموضوع بشكل أكتر احترافية، وبدأ يعلم نفسه بنفسه إزاي يبقى محترف تصوير، وده عن طريق دروس ومحاضرات كان بيتابعها على “اليوتيوب” وبعد فترة، قرر “حرز” يغير كاميرته الكوداك ويطور من نفسه ويشتري كاميرا احترافية، وكانت فتحت خير عليه، واشتغل بيها فترة كبيرة لدرجة إنه صور بيها جزء كبير من صور مشروعه اللي بدأه لتوثيق مصر وجمالها بالصور.

لمعلومات أكتر عن “خليج فيورد”.. ادخلوا هنا.

معلومات أكتر عن “جزيرة هيسا النوبية”.. هتلاقوها هنا.

اعرفوا أكتر عن “الصحراء البيضاء” من هنا.

سافر حرز في مشروعه ده لكتير من الأماكن في مصر، زي كاترين والأقصر وأسوان والفيوم وسيوة والواحات والصحراء السوداء والبيضاء، وكان هدفه الأساسي من كل ده إنه يوصل في المحطات دي إنه يبرز جمال مصر عن طريق الوصول وتصوير أماكن مش كتير يعرفوها ولا راحوها.

بدأ بعد كده “حرز” يعمل أرشيف لكل الصور اللي صورها للأماكن دي، وقرر ينشرها بشكل مباشر ومجاني للناس من خلال صفحته الرسمية وحسابه الشخصي على موقع الفيسبوك.

معلومات أكتر عن “وادي العقبات” هتلاقوها هنا.

وفي 2015 بدأ حرز ياخد شكل تاني في توثيق الأماكن، فبدأ يركز في تصويره على كل مكان لوحده، ويصوره بشكل كافي ووافي، وبعد كده ينشر الصور دي مع معلومات شبه كاملة عن المكان ونبذه عن تاريخه وطريقة زيارته ومواعيدها لو ليه مواعيد، وكل التفاصيل اللازمة للوصول للمكان ده.

ومع الوقت، مشروع “حرز” خد شكل تاني، وبدأ يكتب على كل صورة اسم المكان باللغة الإنجليزية بشكل فني، علشان يدي للصورة طابع أكتر احترافية، لكن في كلامنا معاه قال لنا إن كان نفسه يترجم أسماء الأماكن للعربي كمان، وإن حلمه الجاي يعمل كتاب بيوثق فيه جمال مصر بالصور.