The Definitive Guide to Living in the Capital , Cairo , Egypt

معالم وسياحة -
مقترح

أشجار نادرة ولوحات وأنتيكات.. زيارة لمتحف “ركن فاروق” بحلوان

استراحة فاروق الملكية الملك فاروق متاحف القاهرة متاحف تاريخية في القاهرة متاحف حلوان متحف ركن فاروق
أشجار نادرة ولوحات وأنتيكات.. زيارة لمتحف “ركن فاروق” بحلوان
بواسطة
Mohamed Talaat

مصر مليانة متاحف مهمة، بعضها معروف زي المتحف المصري، وبعضها مش واخد حقه من الشهرة، زي متحف “ركن فاروق”، وهو واحد من أهم المتاحف المصرية اللي مليانة كنوز فنية من زمن الملك فاروق. هنعرفكم في الموضوع ده معلومات مهمة عن المكان ده، اللي بيقع في منطقة حلوان، واللي كانت معروفة وقتها بأنها مدينة الباشاوات.

 

متحف “ركن حلوان” معروف كمان باسم “استراحة فاروق الملكية”، لأنه كان بالفعل استراحة للملك فاروق، وبعد كدة تم تحويله لمتحف تاريخي بيضم جزء كبير من مقتنيات الأسرة العلوية في مصر.

المتحف مبني على الطراز الحديث، وبيتكون من 3 طوابق، والبناء تم سنة 1941، واستمر لحد سنة 1942م.

المتحف الموجود على النيل مباشرة على بعد 6 كيلومترات غرب حلوان بمحافظة القاهرة، بيضم حديقة فيها 33 شجرة مانجو من نوع نادر زراعته في مصر، تم الحصول عليها من ألبانيا.

بيضم المتحف مجموعة قيمة من المقتنيات الملكية من (أثاث، وتحف، وتماثيل ولوحات)، والطابق الأرضي من المتحف له بوابة كبيرة في خلفية القصر وبيحتوي على حجرات الخدم وملحقاتها.

لما بتدخل المتحف هتلاقي في مدخله تمثال من البرونز لامرأة بالحجم الطبيعي محلاة بحلي فرعونية بتعزف على آلة الهارب بقاعدة من الرخام، بالإضافة إلى تمثال لأبي الهول من البرونز وساعة مكتب معدن مذهبة عبارة عن لوحة من البلور، عليها 12 فص عتيق، والعقارب من الذهب، وبتزين لوحة البلور تماثيل لتماسيح فرعونية من الذهب.

لما توصل للطابق الأول هتلاقي سلم رخامي بيوصل للردهة الخارجية اللي هتوصلك بدورها لردهة داخلية، هتوصلك لقاعتين للطعام وقاعة أخرى للتدخين وشرفة بتطل على النيل.

أما الطابق الثاني، فبيضم لوحات رائعة لأشهر فناني العالم وقتها، منها لوحة القاهرة القديمة لإيكوهمان، وتمثال الفلاحة والجرة من الأنتيمون للفنان كوديه، بالإضافة لوجود راديو مزود بجهاز للأسطوانات داخل صندوق من خشب الجوز التركي، عبارة عن شكل معبد بتزينه بعض العواميد المخروطية بتيجان مزخرفة على شكل زهرة اللوتس، وعليه اسم الملك فاروق باللغة الهيروغليفية.

في الطابق ده كمان لوحة أهداها أحد سكان حلوان للملك فاروق عند افتتاح الاستراحة عام 1942م، بتضم آية الكرسي، كمان موجود غرفة الاستراحة الخاصة بالملكة ناريمان، وبتضم سريرها وومرآة، وصورة ليها مع الملك في حفل زفافهم الأسطوري، بالإضافة إلى سرير صغير لولي العهد الأمير أحمد فؤاد.

الاستراحة دي فيها 379 عروسة بتنتمي إلى 33 دولة بأزيائها المختلفة وأشكالها المتميزة، العرائس دي كانت هدايا لملكتي مصر السابقتين فريدة وناريمان، كمان موجود كرسي العرش المذهب وكرسي ولي العهد وهما نسخة مقلدة باتقان لكرسي عرش الملك توت عنخ آمون الأصلي الموجودة في المتحف المصري.

المتحف بيضم كمان ساعة أهدتها ملكة فرنسا السابقة أوجيني للخديوي إسماعيل؛ بمناسبة افتتاح قناة السويس.

 

عنوان المتحف: كورنيش النيل – بجوار عزبة الوالدة – مدخل مدينة حلوان.

تليفون: 20227104218+

مواعيد الزيارة: يوميًا من ٩صباحًا إلى ٥ مساءً.

مقترح