The Definitive Guide to Living in the Capital , Cairo , Egypt

مصر تكتب التاريخ، مقولة مش من فراغ لأن مصر من قديم الأزل هي التاريخ بداية من الحضارة المصرية القديمة وحتى العصر الحالي، وزي ما فيه متاحف فرعونية وقبطية وإسلامية وخلافه، فيه عندنا كمان متاحف عسكرية لا تقل قيمة عن أي متاحف أخرى، وبتسطر تاريخ كبير، ومن ضمن المتاحف العسكرية المميزة “متحف العلمين” اللي أنشأ عام 1956 بقرار من الرئيس الراحل جمال عبد الناصر، وخلال السطور الجاية هنقول لكم على كل اللي محتاجين تعرفوه عن متحف العلمين العسكري.

تم إنشاء المتحف تخليدًا لدور مصر المهم في أهم معارك الحرب العالمية الثانية، وهي معركة “العلمين”، واللي كانت مابين دول الحلفاء ودول المحور في أكتوبر 1942، وهي كانت من أقوى معارك الحرب، ومع مرور السنين المتحف تم ترميمه وصيانته مرتين، المرة الأولى في 1992 في الذكرى الـ50 لمعركة العلمين، والمرة الثانية في الذكرى 72 وأفتتح في 21 أكتوبر 2014 بعد تطويره، وبيضم مجموعة من الأسلحة والمدرعات والمجسمات بتحكي قصة معارك العلمين والقوات اللي شاركت فيها، وكمان فيه خرائط سير المعارك ومجموعة لمقتنيات خاصة بقادة الجيوش.

العرض المتحفي بينقسم لـ3 أقسام حسب ما نشره الموقع الرسمي للقوات المسلحة المصرية، أولهم ساحة العرض المكشوف، وفيها هتلقوا مجموعة من الأسلحة والمعدات الثقيلة بقوات المحور والحلفاء اللي شاركو في معارك العلمين “مدافع – حاملات جنود – دبابات – طائرات – عربات مدرعة”.

أما العرض المتحفي الثاني بينقسم لقسمين “البهو الرئيسي” واللي فيه زخارف على جوانبه بجداريات تحكي قصص الحرب وصور منحوتة لقادة الجيوش ومنهم الإنجليزي برنارد منتجمري والألماني إرفين روميلن وكمان فيه خرائط الحرب لمنطقة دول شمال أفريقيا، ويشمل كمان مقتنيات خاصة موضح تفاصيلها بـ4 لغات، وبيتوسط البهو نصب تذكاري بيعبر عن سنوات الحرب اللي انتهت بالسلام.

والقسم الثاني هو قاعات العرض الدائم، بداية من القاعة المشتركة واللي بتضم مجموعة من المقتنيات العسكرية لكل الدول اللي اشتركت في الحرب وي أدوات الطعام ومجسمات لبعض الجنود وكتاب مقدس، وقاعة بريطانيا اللي فيها مجموعة من خرائط القوات البريطانية اللي شاركت في معارك شمال أفريقيا بتشكيلات مختلفة، ومجسمات لبعض جنود وضباط الجيش البريطاني، وأسلحة وذخائر استخدمتها بريطانيا خلال الحرب.

أما قاعة مصر فبتوثق دورها اللوجيستي والميداني خلال الحرب العالمية طبقًا للمعاهدة اللي كانت بين مصر وبريطانيا، وبتوضح كمان الخسائر اللي مصر اتعرضت لها أثناء الحرب العالمية الثانية.

وفيه كمان قاعة ألمانيا اللي بتحتوي على مجموعة من الخرائط والأسلحة والمقتنيات الخاصة بالقوات الألمانية مع مجسمات للجنود والضباط والمقتنيات الخاصة بالقادة الألمان وعلى رأسهم إرفين روميل، وأخيرًا قاعة إيطاليا اللي بتضم مجسم لشعار القوات البريطانية خلال الحرب العالمية، وتماثيل لجنود وضباط بالأزياء المختلفة، وفيها كمان مجموعة من الذخائر والأسلحة المستخدمة في معارك العلمين، والقسم الثالث هو قاعة العرض المؤقت واللي بتكون طبقًا لخطط الاحتفالات التابعة للمتحف.

متحف العلمين العسكري بيضم مجموعة من الأنشطة التعليمية المختلفة المناسبة لكل الأعمار من خلال مكتبة متميزة مفيدة للطلاب والباحثين الأكاديميين وكمان بتحتوي على مجموعة من كتب التاريخ العسكري المتميزة، وكمان بيضم المتحف ساحة انتظار سيارات ومهبط طيران ومحل هدايا ومطعم وكافيتريا لخدمة زوار المتحف.

ومواعيد زيارة المتحف بتكون يوميًا من 9 صباحًا حتى 4 مساءً، وعنوانه علامة الكيلو ١٠٥ علي طريق الإسكندرية – مطروح، جنوب الطريق الساحلي.

وتقدروا تعرفوا أكتر عن المتحف من خلال زيارة الموقع الرسمي من هنا.

أو الاتصال بهم على رقم التليفون: 0464100031