The Definitive Guide to Living in the Capital , Cairo , Egypt

مؤخرًا حجز تذاكر السفر من وإلى القاهر بقى أسهل من الأول. ظهرت خدمات إلكترونية وتطبيقات كتير، سهلت الموضوع. وبقيت تحجز تذكرتك وأنت في مكانك. زي خدمة “جو ميني” اللي عرضناها في واحدة من مقالاتنا. وفي المقال ده بنعرض لكم خدمة جديدة وهي “تذهب”.

“تذهب” أطلقت موقعها بـ 4 خطوط يشملوا 19 مدينة. 16 منهم تقدر تسافرهم من القاهرة. كل مدينة لها سعرها ونوع أتوبيس محدد، طبقًا للخدمات المتوفرة فيها. وتقدر تطلب مباشرة عن طريق موقعهم، بعد ما تعمل حساب سواء عن طريق الإيميل أو فيسبوك. والدفع متاح بكارت بنكي، أو فودافون كاش.

الحجز متاح لأتوبيسات (الحصان الذهبي – أتوبيسي – جو باص) بأسعارهم الرسمية.

– خط أتوبيس الوجه البحري يشمل على تذاكر لمحافظات إسكندرية، مطروح، الساحل الشمالي. ويبدأ سعر التذكرة من 60 جنيه. لكن المتاح حاليًا الإسكندرية بس، نظرًا لعدم وجود رحلات لمطروح والساحل غير في الصيف.

– أما خط أتوبيس البحر الأحمر هتلقى عندهم رحلات (الغردقة – العين السخنة – مرسى علم – سفاجا – الجونة – القصير). أسعار الرحلات، الغردقة ورأس غالب: 140 جنيه – الجونة: 190 –  سفاجا: 150 – القصير: 230 – العين السخنة: 60.

– كمان فيه خط أتوبيس جنوب سيناء، وده بيوصلك من القاهرة لـ (دهب: 180 جنيه – شرم الشيخ: 150 – نويبع: 270).

– وأخيرًا الخط الرابع للصعيد. ده متاح لمحافظات (الأقصر: 185 جنيه – قنا: 140 – سوهاج: 120).

علشان تحجز رحلتك بتدخل على موقعهم الإلكتروني وتسجل تبع الخطوات الموضحة. وخلي بالك من مكان تحرك الأتوبيس قبل ما تختار الكرسي، علشان تعرف مناسب لك ولا لأ. لأن المحطات من (عبود – مدينة نصر – التحرير – المنيب). وبعد كده بتختار طريقة الدفع. وبكده يبقى معاك تذكرتك على الإيميل. هتحتاج تروح قبل ميعادك بـ 15 دقيقة، علشان تأكد على تذكرتك من شباك الحجز.

كمان متاح تلغي الحجز، لكن قبل 4 ساعات من الميعاد المحدد. بيبقى فيه رسوم خصم 15 جنيه، وتسترد باقي فلوسك بالطريقة اللي دفعت بيها. غير كده مش متاح إلغاء التذكرة نهائيًا. 

نصيحتنا ليك خلي الحجز باسمك اللي في البطاقة، علشان تستلم بيها تذكرتك لأن الشركات بتعترض إنك تكتب اسم الشهرة بتاعك. يمكن العيب الوحيد اللي شوفناه هو إن طرق الدفع محدودة، ومفيش أبليكيشن حتى الآن لهم. 

اعرفوا تفاصيل أكتر من صفحتهم على فيسبوك.